تلنگانہ ہائی کورٹ نے ریاست میں بڑھتے ہوئے کورونا وائرس کے انفیکشن کے پیش نظر سماعت کرتے ہوئے حکومت کے موقف پر شدید ناراضگی کا اظہار کیا اور کہا کہ تلنگانہ حکومت کو 48 گھنٹوں میں لاک ڈاؤن یا کرفیو کے بارے میں فیصلہ لینا چاہیے ورنہ عدالت حکم جاری کرے گی۔
عدالت نے سوال کیا کہ عوامی اجتماعات کو کم کرنے کے لیے اقدامات کیوں نہیں کیے گئے؟ سنیماگھروں، پبس اور بارس میں عوام کی تعداد کو کم کرنے کے لیے کیا اقدامات کے گئے؟
عدالت نے کہا کہ حکومت کی جانب سے اس مسئلہ پر عدالت میں پیش کردہ رپورٹ میں تفصیلات کی کمی ہے، بنچ نے سرکاری وکیل سے سوال کیا کہ کیا پبس، شراب کی دوکان اہم ہیں؟
اس موقع پر ایڈوکیٹ جنرل نے کہا کہ حکومت جلد ہی بڑے عوامی اجتماعات پر قابو پانے کے اقدامات کرے گی، عدالت نے کہا کہ ایک ایسے وقت میں جب عوام کی زندگیوں کو خطرہ ہے، حکومت کب فیصلہ کرے گی؟ عدالت نے برہمی کا اظہار کرتے ہوئے کہا کہ کیا آپ چاہتے ہیں کہ اس معاملے میں ہائی کورٹ ہدایت دے؟
ہائی کورٹ نے متعدد ہدایات جاری کی ہیں اور تلنگانہ حکومت سے مکمل رپورٹ بھی طلب کی ہے، عدالت نے گریٹر حیدرآباد میونسپل کارپوریشن کے مثبت کیس سے متعلق حکومت سے 'وارڈ وائز ڈیٹا' بھی طلب کیا ہے۔
شادیوں، تقریبات اور عوامی مقامات پر لوگوں کی بڑی تعداد کے اجتماع کے بارے میں ہائیکورٹ نے کہا کہ حکومت کو اس سلسلے میں اقدامات کرنے چاہیے، جمعہ کو ہونے والی اگلی سماعت میں مرکزی حکومت کو جواب دینے کو کہا گیا ہے۔
ریاست میں پیر کو جاری کردہ اعداد و شمار کے مطابق 4،009 افراد کورونا سے متاثر پائے گئے جبکہ 14مریض کی موت بھی ہوئی تھی، اس کے ساتھ ہی ریاست میں متاثرہ افراد کی تعداد 3.55 لاکھ تک پہنچ گئی ہے جبکہ ہلاکتوں کی تعداد 1،838 ہوگئی ہے۔
