خلیج بنگال میں منگل کو ہوا کے کم دباؤ کا علاقہ بنا رہا جس کے زیرِ اثر تلنگانہ کے کئی مقامات پر بارش کا امکان ظاہر کیا گیا ہے۔ ریاست کے اضلاع عادل آباد، کومرم بھیم آصف آباد، منچریال، نرمل، نظام آباد اور جگتیال میں شدید بارش کی پیش گوئی کی گئی ہے۔
منگل کو کومرم بھیم ضلع کے وینکٹ راؤ پیٹ میں 13.8 سنٹی میٹر بارش ریکارڈ کی گئی۔ سوریہ پیٹ ضلع کے اُورلوگُنڈہ میں 7.8سنٹی میٹر، کھمم ضلع کے چنتاکارا میں 7.7 سنٹی میٹر، سداشیوپیٹ میں 7 سنٹی میٹر، سری پورم، کومرم بھیم ضلع کے ویلی اور کوٹالہ میں 7.6 سنٹی میٹر بارش ریکارڈ کی گئی۔ کاغذنگر میں 7.5 سنٹی میٹر، منچریال کے بھیماورم میں 6.9 سنٹی میٹر بارش ریکارڈ کی گئی۔ راجناسرسلہ، کھمم، میدک، سنگاریڈی اضلاع سمیت دیگر مقامات پر شدید بارش ہوئی۔ سکندرآباد، کاپرا، رام چندرا پورم، پٹن چیرو، چندا نگر،سیری لنگم پلی، موسی پیٹ، ملکاجگری، لنگم پلی، الوال، راجندر نگر، جوبلی ہلز، بنجارا ہلز، بیگم پیٹ، خیریت آباد، رامنتاپور، اُپل، چندرائن گٹہ، حیات نگر اور پرانا شہر کے کئی مقامات پر بارش ہوئی۔
یہ بھی پڑھیں: تلنگانہ ای سیٹ کے نتائج جاری
حیدرآباد کے محکمۂ موسمیات کی ڈائریکٹر ناگارتنا نے کہا کہ ہوا کے کم دباؤ کا علاقہ اوڈیشہ پر مرکوز ہے۔ اس کے زیر اثر آئندہ 24 گھنٹوں کے دوران تلنگانہ میں کئی مقامات پر بارش کا امکان ہے۔ محبوب نگر ضلع میں دو دنوں سے شدید بارش کا سلسلہ جاری ہے۔ بالائی علاقوں میں ہوئی بارش کے نتیجہ میں آبی پروجیکٹس کی سطح آب میں تیزی کے ساتھ اضافہ ہوتا جارہا ہے۔
یو این آئی
