حیدرآباد میں دوبارہ لاک ڈاؤن کے نفاذ کی اطلاعات کے درمیان شہر میں مقیم اے پی سے تعلق رکھنے والے افراد کی بڑے پیمانہ پر پڑوسی ریاست اے پی روانگی کے نتیجہ میں تلنگانہ کے ضلع سوریہ پیٹ میں واقع اے پی کی سرحد کے قریب بڑے پیمانہ پر گاڑیاں دیکھی گئیں۔ ان میں زیادہ تر کاریں ہیں۔
سرحد پر اجازت نامہ کے ساتھ کووڈ-19 کے نمونوں کی جانچ کے دستاویزات رکھنے والوں کو ہی عہدیداروں کی جانب سے اے پی میں جانے کی اجازت دی گئی۔
اس موقع پر خصوصی طورپر قائم مرکز میں مسافرین کی تفصیلات حاصل کی گئیں۔ پاس نہ رکھنے والوں کو جانے کی اجازت نہیں دی گئی۔
بعض افراد نے شکایت کرتے ہوئے کہا کہ گذشتہ روز تک کسی بھی پابندی کے بغیر اس چیک پوسٹ سے اے پی کو جانے کی اجازت دی گئی تھی تاہم بڑے پیمانہ پر گاڑیوں کی آمد کے پیش نظر نئے قواعد اور پابندیاں عائد کی جارہی ہیں۔ بعض افراد ٹووہیلر گاڑیوں پر بھی روانہ ہوئے۔
