بیرون ملک میں پھنسے بہار اور جھارکھنڈ کے باشندوں کی واپسی کا سلسلہ ہنوز جاری ہے ۔جمعرات کو گیا انٹرنیشنل ہوائی اڈے پر دو طیاروں کی لینڈنگ ہوئی ہے، جس میں بالترتیب 187 اور 172 بہار اور جھارکھنڈ کے باشندے واپس آئے ہیں۔ ان کے پہنچتے ہی سب سے پہلے ایئرپورٹ پر موجود محکمہ صحت اور ڈبلیو ایچ او کی ٹیم نے اسکریننگ اور طبی جانچ کی۔
ایئرپورٹ ڈائریکٹر دلیپ کمار اور ضلع انتظامیہ کے اعلی حکام وہاں موجود تھے۔ سبھی کو وندے کٹ دیکر ملک میں خیر و عافیت کے ساتھ واپسی پر مبارک بادی دی گئی۔ ایئرپورٹ پر قانونی مراحل سے گزرنے کے بعد قرنطینہ کرنے کے لیے بودھ گیا بھیجا گیا ہے۔ نئی گائڈ لائن کے تحت سات دنوں کی مدت گزار کر انکی اپنے گھر واپسی ہوگی۔
ایئرپورٹ ڈائریکٹر دلپ کمار نے بتایا کہ دبئی سے 187 مہاجر مزدوروں کی واپسی ہوئی ہے۔ ان سبھی کا تعلق بہار سے ہے جبکہ ڈھاکہ سے آنے والے طیارے میں 172 تارکین وطن واپس آئے ہیں، ان میں 91 افراد کا تعلق جھارکھنڈ ریاست سے ہے۔
خیال ہو کہ گیا ہوائی اڈے پر بیرون ملک میں پھنسے بھارتیوں کی واپسی 18 مئی سے شروع ہوئی تھی۔ بہار و جھارکھنڈ کے باشندوں کے لیے گیا ہوائی اڈے کو لینڈنگ پوائنٹ بنایا گیا ہے۔ یہاں ہوائی اڈے پر آنے والوں کو بودھ گیا میں قرنطینہ میں رکھا گیا ہے۔
