ہندوستانی عوام مورچہ کی ورچوئل میٹنگ ہوئی جس میں قومی صدر و سابق وزیراعلی جیتن رام مانجھی نے کارکنان کو لوگوں کے درمیان ویکسینیشن مہم چلانے پر زور دیا۔ مانجھی نے اپنی پارٹی کے کارکنان و رہنماؤں سے ورچوئل میٹنگ میں خطاب کرتے ہوئے کہا کہ ابھی بھی دیکھا جا رہا ہے کہ افواہوں کی زد میں سب سے زیادہ دلت، مہادلت اور اقلیتی اکثریتی والے علاقے ہیں۔ ان علاقوں میں ویکسینیشن کی رفتار زیادہ نہیں ہے، ایسے میں ان کی پارٹی کے ہر فرد کی ذمہ داری ہے کہ وہ سبھی علاقوں میں ویکسینیشن مہم چلائیں، لوگوں کے دلوں سے ڈر کو نکالیں اور زیادہ سے زیادہ ویکسین لینے پر لوگوں کو راضی کریں۔
پارٹی کے جن رہنماوں اور کارکنان نے ویکسین نہیں لیا ہے وہ بھی آگے آئیں اور خود ویکسین لے کر لوگوں کو بتائیں کہ انہوں نے بھی لے لیا ہے، مانجھی نے اس کے ساتھ ہی ضلع میں پارٹی کو مضبوطی فراہم کرنے، عوام کے کاموں میں دلچسپی لینے اور خاص طور سے حکومت کے منصوبوں کی جانکاری عوام تک پہنچانے پر بھی زور دیا۔
مانجھی نے کہا کہ کورونا کی وجہ سے جن کی موت ہوئی ہے اور ان کے رشتے داروں کے پاس کورونا پوزیٹیو کی رپورٹ ہونے کے باوجود اگر ریاستی حکومت کی طرف سے چار لاکھ روپیے دی جانے والی مدد کا فائدہ نہیں ملا ہے تو متعلقہ افسران سے رابطہ کریں، مانجھی نے ہم پارٹی کے سبھی اسمبلی حلقوں میں ترقیاتی کاموں پر بھی زور دیا ہے، ضلع گیا میں امام گنج، ٹکاری اور بارہ چٹی اسمبلی حلقہ سے ہم پارٹی کے ایم ایل اے ہیں۔
واضح ہو کہ آج منگل کو ہندوستانی عوام مورچہ سیکولر ضلع گیا کی ورچوئل میٹنگ ضلع صدر ڈاکٹر صبغت اللہ خان عرف ٹو ٹو خان کی صدارت میں منعقد ہوئی جس میں پارٹی کے ضلع و ریاستی سطح کے رہنماوں نے حصہ لیا۔ میٹنگ میں سابق وزیراعلی جیتن رام مانجھی نے بھی خطاب کیا۔ ساتھ ہی ضلع صدر ڈاکٹر صبغت اللہ خان نے خطاب کرتے ہوئے کہا کہ ان کی پارٹی نے ضلع میں ترقیاتی کاموں میں بڑھ چڑھ کر جصہ لیا اور گزشتہ برس لاک ڈاون میں جس طرح سے لوگوں کی خدمت کی تھی اس سے پارٹی مضبوط ہوئی ہے، یہی وجہ ہے کہ انتخاب میں پارٹی نے ضلع میں تین سیٹوں پر جیت درج کر کے بڑی کامیابی حاصل کی تھی۔ اس موقع پر ورچوئل میٹنگ میں خطاب کرنے والوں میں اجے سنگھ، دلیپ یادو، منا، اکرام خان، عظمت خان، شنکر مانجھی، نندلال مانجھی، نارائن مانجھی منی دیوی، پپو خان وغیرہ کا نام قابل ذکر ہے۔
