بہار کے ضلع گیا میں کورونا وبا کے بڑھتے کیسز سے انتظامیہ بھی فکر مند ہے۔ کووڈ 19 ہسپتال اے این ایم ایم سی ایچ میں بڑھتے مریضوں کے بوجھ کو دیکھتے ہوئے متعدد مقامات پر کووڈ کیئر ہیلتھ سینٹر کا قیام عمل میں لایا گیا ہے۔
شیرگھاٹی سب ڈویژن میں 75 بیڈ کا ہیلتھ کیئر اور آئیسولیشن وارڈ بنایا گیا ہے جہاں ضروری ادویات سمیت آکسیجن کا انتظام کیا گیا ہے۔ اس کے علاہ شہر کے گاندھی میدان میں واقع انڈور اسٹیڈیم میں پچاس بیڈ، نظامیہ یونانی میڈیکل کالج و ہسپتال کو کووڈ 19 کے لئے مخصوص کیا گیا ہے۔
ان مقامات پر ویسے مریضوں کو رکھا جائے گا جنہیں آکسیجن کی ضرورت ہوگی اور پہلے سے خطرناک بیماریاں نہیں ہوں گی، اگر آکسیجن کے علاوہ وینٹیلیٹر کی ضرورت ہوگی تو ویسے مریضوں کو اے این ایم ایم سی ایچ میں بھرتی کیا جائے گا۔
ڈسٹرک مجسٹریٹ نے سبھی جگہوں پر پیر کوپہنچ کر جائزہ لیا اور جو کمیاں تھیں اسے فوری طور پر دور کرنے کی ہدایت دی ہے۔
ڈی ایم ابھشیک کمار سنگھ نے کہا کہ کورونا کے کیسز بڑھیں گے تاہم اس سے گھبرانے کے بجائے وقت پر خود کی جانچ کرائیں اور انتظامیہ کو تعاون دیں۔ ڈسٹرکٹ مجسٹریٹ نے میونسپل کمشنر ساون کمار کو صفائی ستھرائی اور کافی تعداد میں موبائل ٹوائلٹ مہیا کرانے کی ہدایت دی اور سینئر سپرنٹنڈنٹ پولیس راجیو مشرا کو انڈور اسٹیڈیم میں پولیس جوانوں کو تین شفٹوں میں تعینات کرنے کی ہدایت دی ہے۔
معائنہ کے دوران ڈی پی ایم ہیلتھ نے بتایا کہ اس کووڈ کیئر سنٹر کم آئیسولیشن سنٹر میں مجموعی طور پر 50 بیڈ لگائے گئے ہیں اور یہاں پر آکسیجن بھی مہیا کرایا گیا ہے۔ انہوں نے کہا کہ ڈاکٹروں اور پیرا میڈیکل اسٹاف کے قیام کے لئے چیمبر بھی بنائے جارہے ہیں۔ ضلع مجسٹریٹ نے مناسب جگہوں پر پینے کا پانی مہیا کرنے کی ہدایت دی ہے۔
ضلع مجسٹریٹ نے گیا-بیلا بارڈر کے قریب نظامیہ یونانی میڈیکل کالج میں بنائے جارہے 60 بیڈس کے کووڈ ہیلتھ کیئر سنٹر اور ٹیسٹنگ سنٹر کا بھی معائنہ کیا۔ انہوں نے ڈی پی ایم ہیلتھ کو ہدایت کی کہ وہ ڈاکٹروں اور نرسنگ عملے کے قیام کے مناسب انتظامات کریں۔
