جرائم پیشہ افراد مسلسل مجرمانہ واقعات کو انجام دے رہے ہیں لیکن پولیس انہیں پکڑنے میں کامیاب نہیں ہو پا رہی ہے۔ دیر شام کو شہر کے ڈلہا تھانہ حلقہ کے باگیشوری محلے میں ایک نوجوان کو گولی مار دی گئی۔ جس سے وہ شدید طور سے زخمی ہو گیا۔ زخمی انوگرہ نارائن ہسپتال میں زیر علاج ہے۔
ڈاکٹروں کے مطابق اس کی حالت سنگین بنی ہوئی ہے۔ اطلاع کے مطابق باگیشوری محلے میں بات چیت کے دوران کچھ تنازع ہوا تھا اور اس کے بعد مار پیٹ ہوئی۔ اسی دوران سونوپاسوان کو جرائم پیشہ افراد گولی مار کر فرار ہو گئے۔
زخمی سونوپاسوان کے مطابق قریب آٹھ دن پہلے وکی نامی بدمعاش سے جھڑپ ہوئی تھی۔ وکی اس کی تلاش میں کئی دنوں سے تھا۔ واقعہ کو انجام دینے سے پہلے سونو پاسوان کو فون کر کے بلایا اور پھر اس کو پہلے پیٹا اور اس کے بعد اسے گولی مار دی۔ گولی اس کے ناک کے پاس لگی ہے۔ واقعہ کی اطلاع کے بعد ڈلہا تھانہ کی پولیس پہنچی اور زخمی سونو کو ہسپتال پہنچایا جہاں اس کا علاج چل رہا ہے۔
ڈلہا تھانہ انچارج ارون کمار نے بتایا کہ معاملے کی جانچ چل رہی ہے۔ کیس درج کر کے مجرموں کی تلاش جاری ہے۔ جلد ہی انہیں گرفتار کر لیا جائے گا۔
واضح ہو کہ اتوار کی رات کو آٹواور کارکی ٹکر کے بعد کارسوار بدمعاشوں نے آٹو ڈرائیور روی کو گولی مار کر ہلاک کر دیا تھا۔ اس کے بعد سے آٹو یونین مجرموں کی گرفتاری کے مطالبے کے ساتھ ہڑتال پر چلی گئی تھی۔ منگل کو بھی ہڑتال جاری رہی۔ یونین نے منگل کی شام کو احتجاجی جلوس بھی نکالا ہے۔
