'بی جے پی کی ورچوئل ریلی کا مقصد حقیقت پر پردہ ڈالنا ہے'

شہر گیا کے ٹاور چوک میں واقع اندرا گاندھی کے مجسمہ کے قریب کانگریس پارٹی کے رہنماؤں نے مرکزی و ریاستی حکومت کے خلاف کالے غبارے اڑائے، کانگریسی رہنماؤں نے کہا کہ ورچوئل ریلی کے ذریعے بی جے پی اپنی اصل حقیقت کو چھپانے کی کوشش کررہی ہے۔

ریاست بہار کے ضلع گیا میں اتوارکے روز سیاسی گہماگہمی کے دوران تمام سیاسی رہنما ایک دوسرے پر شدید نکتہ چینی کرتے نظر آئے۔

بی جے پی کی ورچوئل ریلی کی مخالفت میں کانگریس پارٹی اور آرجے ڈی کے رہنماؤں نے اپنے کارکنان کے ساتھ سڑک پر اتر کراحتجاج کیا۔

اس دوران کانگریس پارٹی نے احتجاج میں کالے غبارے اڑائے تو آرجے ڈی نے تھالیان پیٹیں۔حزب اختلاف رہنماؤں نے وزیر داخلہ امیت شاہ پر کورونا سے نمٹنے کے بجائے اپنی پارٹی کی تشہیر کے لئے پیسے برباد کرنے کاالزام عائد کیا۔

شہر گیا کے ٹاور چوک میں واقع اندرا گاندھی کے مجسمہ کے قریب مرکزی حکومت کی مخالفت میں درجنوں کانگریسی رہنماؤن نے جمع ہوکر نعرے بازی کی۔

کانگریسی رہنماؤں نے بی جے پی کی ورچوئل ریلی کو ناکام بتاتے ہوئے کہاکہ' اس سے غریب ومہاجر مزدوروں کا پیٹ نہیں بھریگا، ان کے کھانے پینے سمیت ان کے مسائل کوحل کرنے میں وزیرداخلہ کودلچسپی رکھنی چاہئے۔

کانگریسی رہنماؤں نے وزیرداخلہ امیت شاہ اور صوبے کے وزیراعلی نتیش کمار سے سوال پوچھتے ہوئے کہاکہ' بہار میں تیرہ برسوں سے انکی حکومت ہے تو پھر یہاں مزدوروں کے لئے روزگار کیوں نہیں ہے؟ بہار کو خصوصی ریاست کادرجہ کیوں نہیں دیا گیا۔

کانگریس کے سنیئر رہنما ومگدھ کمشنر کے ترجمان پروفیسر وجے کمار میٹھو نے کہاکہ' ورچوئل ریلی کورونا وبا کے دوران لاک ڈاون کی حقیقت کو چھپانے کے لئے ہے۔

انہوں نے کہا کہ'بی جے پی حکومت صرف فضول خرچی کرتی آئی ہے بہار کے مہاجر مزدور بے حال ہیں، ان کی حالت زار پر حکومت کو ترس نہیں آرہا ہے۔

یہاں کورونا وائرس کے تعلق سے صرف خانہ پری کی گئی ہے ۔نوٹ بندی کی ہی طرح لاک ڈاؤن بھی ناکام ثابت ہوا۔