ریاست بہار کے ضلع گیا کے گرواتھانہ حلقے میں بارہ برس کی بچی کے ساتھ جنسی زیادتی کا معا ملہ سامنےآیا ہے۔
اطلاع کے بعد پولیس نے فوری کارروائی کرتے ہوئے ملزم کو گرفتار کرلیا ہے۔
بتایا جا رہا ہے کہ بچی رفع حاجت کے لیے باہرگئی تھی جسے تنہا پا کر سگے ماموں نے اپنی ہوس کا شکار بنایا۔
معاملے کے متعلق تھانہ خاتون انچارج روی رنجنہ کماری نے بتایا کہ 'یہ معا ملہ ضلع کے گروا پولیس تھانہ علاقے میں پیش آیا ہے۔ جہاں ایک 12 سالہ بچی کو اس کے اپنے ماموں نے جنسی زیادتی کا نشانہ بنایا ہے، پولیس نے متاثرہ بچی کے ماموں کو گرفتار کرلیا ہے۔'
خاتون انچارج نے بتایا کہ 'ماموں اپنی بھانجی کو کئی مہینوں سے ہوس کا شکار بنا رہا تھا۔ پہلی بار جنسی زیادتی اس وقت کی گئی تھی جب بچی رفع حاجت کے لیے گھرسے باہر نکلی تھی۔ ملزم ماموں نے بچی کے ساتھ جنسی زیادتی کرنے کے بعد اس کو جان سے مارنے کی دھمکی بھی دی۔'
گھر والوں کو اس بات کا پتہ تب چلا جب بچی جنسی زیادتی کی وجہ سے حمل سے ہوگئی تھی،اور خوف کی وجہ سے لڑکی اپنے گھر والوں کو کچھ نہ کہ سکی تھی۔
اچانک بچی کی طبیعت خراب ہونے کی وجہ سے ڈاکٹروں نے اس بات کی نشاندہی کی کہ بچی حمل سے ہے۔
گھر والوں کے پوچھنے پر، لڑکی نے بتایا کہ اس کے ماموں نے اس کے ساتھ یہ گھناؤنا کام کیا ہے۔
گھر والوں نے خاتون پولیس سے اس کی شکایت درج کرائی ہے۔
بچی کے بیان پر تھانے میں مقدمہ درج کرنے کے بعد ملزم ماموں کو گرفتار کرکے جیل بھیج دیا گیا ہے۔
