ریاست ہریانہ میں فرید آباد کے بلبھ گڑھ میں سرے عام ایک طالبہ کو گولی مار کر ہلاک کرنے کے معاملے پر ریاستی وزیر داخلہ انل وج نے کہا ہے کہ ہریانہ میں ابھی بھی جرائم پر مکمل طور سے قابو نہیں پایا گیا ہے، لیکن پہلے کے مقابلے میں جرائم میں کافی حد تک کمی واقع ہوئی ہے۔
انل وج نے یہ بھی کہا کہ ہریانہ حکومت نے ایسے تمام معاملات میں 100 فیصد کاروائی کی ہے۔
واضح رہے کہ بلبھ گڑھ میں پیر کے روز کار میں سوار دو شرپسندوں نے ایک لڑکی کو سرے عام گولی مار کر ہلاک کردیا تھا، جس کے خلاف فرید آباد کے سیکٹر 23 میں مقتول لڑکی کے اہل خانہ کا اپنا گھر کالونی کے باہر احتجاج جاری ہے۔
مقتول بچی کے اہل خانہ کا مطالبہ ہے کہ اس کیس کو فاسٹ ٹریک عدالت میں چلایا جائے اور قاتلوں کو پھانسی کی سزا دی جائے، تاکہ اس کی بیٹی کو جلد سے جلد انصاف مل سکے۔ کنبہ کے افراد کا کہنا ہے کہ پولیس ان کی بیٹی کے مرنے کا انتظار کر رہی تھی۔
فی الحال پولیس نے اس معاملے میں دونوں ملزمین کو گرفتار کرکے انھیں پانچ روز کی ریمانڈ پر بھی لے لیا ہے۔
