تغلق آباد کے مقامی بی جے پی رہنما وکرم ودھوڑی نے تغلق آبادکی ریلوے کالونی میں گنگا جل سے صفائی کروائی کیونکہ وہاں تبلیغی جماعت کے لوگوں کو لایا گیا تھا۔
وکرم ودھوڑی نے کہا کہ ”تغلق آبادکے ریلوے کالونی میں جہاں نظام الدین سے پکڑے گئے جماعتیوں کے لیے کورینٹین سینٹر بنایا گیا وہاں سینیٹائزر کے ساتھ گنگا جل کا بھی چھڑکاو کیا گیا جس سے یہ کالونی جو انسانیت اور وطن مخالف سے ناپاک ہوگیا تھا اب وہ پاک اور صاف ہوجائے گا۔“
وکرم ودھوڑی نے اپنے اس پوسٹ کو فیس بک پر بھی شئر کیا جس کی کافی تنقید کی گئی تو وکرم ودھوڑی نے ایک اور ٹویٹ کیا جس میں انہوں نے اپنے بیان کے لیے معافی نہیں مانگی بلکہ اس پر قائم رہے۔
تبلیغی جماعت کے ذریعہ کورونا وائرس کے پھیلاؤ کے حوالے سے جومنفی بحث ومباحثہ کیے گئے اب اس کے اثرات ظاہر ہونے لگے ہیں۔تبلیغی جماعت کے نام پر ایک خاص طبقہ کو نشانہ بنایا جارہا ہے۔
واضح رہے کہ گزشتہ روز شاستری پارک کی ایک کالونی میں آر ڈبلیو اے کی میٹنگ میں مسلمانوں کی آمدورفت پر پابندی لگانے کا اعلان کیا گیا اور اس کا ویڈیو فیس بک پر بھی ڈالا گیا تھا، مگر پولیس کی مداخلت کے بعد یہ ویڈیو ہٹا لیا گیا۔
