وبائی مرض کووڈ 19 کے دوران وفات پانے والے ملازمین کے اہل خانہ کو فوری راحت دینے کی غرض سے شیخ الجامعہ پروفیسر نجمہ اختر نے جامعہ کے سبھی ڈینز صدور شعبہ اور انتظامی اکائیوں کے سربراہان کو ہدایت دی ہے کہ حکومت کے ضوابط کے مطابق ان مرحومین کے اہل خانہ کو جو بھی مراعات مل سکتی ہیں ان سے متعلق کاغذات کو فوری طور پر پروسیس کریں۔
جامعہ ملیہ اسلامیہ نے سارے ڈینز، صدور شعبہ، ڈائریکٹرز اور انتظامی اکائیوں کے سربراہان کو ایک سرکلر جاری کیا ہے کہ وہ متوفی ملازمین کے نام، عہدے اور دیگر متعلقہ تفصیلات فوری طور پر رجسٹرار دفتر کے متعلقہ سیکشن کو جلد از جلد ارسال کر دیں تاکہ اس سلسلے میں یونیورسٹی فوری کارروائی کرکے متوفی ملازمین کے اہل خانہ کو ان کی جائز مراعات اور مالی راحت پہنچانے کی کارروائی تیزی کے ساتھ انجام دے سکے۔
دہلی میں کورونا کی دوسری لہر کے دوران یونیورسٹی کے مختلف تدریسی اور غیر تدریسی ملازمین نے داعی اجل کو لبیک کہا ہے۔ یونیورسٹی اپنے بیش قیمت لوگوں کو کھونے کی وجہ سے گہرے صدمے میں ہے۔ دکھ اور صدمے کی اس گھڑی میں یونیورسٹی کی ہمدردی متوفی ملازمین کے اہل خانہ کے ساتھ ہے۔
حال ہی میں وفات پانے والے جامعہ فیکلٹی اور جامعہ اسٹاف کے تعزیتی نشستوں میں پروفیسر نجمہ اختر شیخ الجامعہ نے مسجل اور افسر مالیات کو ہدایت دی ہے کہ حکومت کے ضوابط کے مطابق متوفی ملازمین کو ملنے والی مراعات کی ادائیگی کے لیے ایک ٹیم تشکیل دیں۔
شیخ الجامعہ نے یونیورسٹی کے ملازمین کے قبل از وقت موت پر گہرے دکھ کا اظہار کرتے ہوئے انہیں جنت الفردوس میں اعلیٰ سے اعلیٰ درجات کے لئے دعا کی۔
