'دہلی حکومت لوگوں کے بنیادی حق کی خلاف ورزی کررہی ہے'

دہلی اسمبلی میں اپوزیشن کے لیڈر رام ویر سنگھ بدھوڑی نے کورونا جانچ کم کرنے کے دہلی حکومت کے فیصلے کو لوگوں کے بنیادی حق کی خلاف ورزی قرار دیتے ہوئے سنیچر کو کہا کہ سیاسی بیان بازی کے بجائے مریضوں کی دقتوں کو دور کرنے کی ضرورت ہے۔

وزیر صحت ستیندر جین کے آج کورونا جانچ کم کرنے کو انڈین کونسل آف میڈیکل ریسرچ (آئی سی ایم آر) کی رہنما ہدایات بتائے جانے پر مسٹر بدھوڑی نے سوال کیا کہ وہ (مسٹر جین) یہ بتائیں کہ پہلے زیادہ جانچ کرکے کیا کونسل کی رہنما ہدایات کی خلاف ورزی کرکے کی جارہی تھی۔

انہوں نے کہا کہ آئین ساز بابا صاحب امبیڈکر کا حامی ہونے کا دم بھرنے والے اروند کیجیوال نے کورونا کی جانچ کم کرکے لوگوں کا بنیادی حق تو چھینا ہی ہے، آئین کی کھلی خلاف ورزی بھی کی ہے۔