سی اے اے اور این آر سی مخالف دھرنے میں کانگریس کی صدر سونیا گاندھی، سابق وزیر اعظم منموہن سنگھ کے علاوہ راہل گاندھی اور پرینکا گاندھی سمیت متعدد اراکین پارلیمان و کانگریس کے سینیئر رہنماؤں نے دھرنے میں شرکت کی۔ بڑی تعداد میں کانگریس کارکنان اور عام لوگ بھی دھرنے میں شامل ہیں۔
دھرنے کے مقام پر کانگریس کے سرکردہ رہنماؤں نے میڈیا سے بات چیت کی اور اس متنازع قانون کے خلاف جم کر بولے۔ کانگریس کے سینیئر رہنما راشد علوی، شکتی سنگھ گوہل، ندیم جاوید، کیرتی آزاد، راجیو شکلا نے یک آواز کہا کہ یہ کالا قانون ہے۔ یہ قانون آئین ہند کے روح کے منافی اور بابائے قوم مہاتما گاندھی کی تعلیمات کے خلاف ہے۔ دستور ہند ہمیں مذہب کی بنیاد پر تفریق کرنے کی اجازت نہیں دیتا۔ بی جے پی اسے ووٹ بینک کے طور پر دیکھ رہی ہے لیکن اسے نقصان اٹھانا پڑے گا کیوں کہ ملک کی اکثریت اس قانون کے خلاف آج سڑکوں پر ہے اور اسے حکومت کو سمجھنا ہوگا۔
