وزیر اعظم نریندر مودی اور کانگریس کی جنرل سکریٹری پرینکا گاندھی نے ہفتہ کے روز سابق وزیر اعظم اندرا گاندھی کی برسی پر انہیں خراج عقیدت پیش کیا۔
وزیر اعظم نے گذشتہ اتوار کو بھی اپنے ماہانہ 'من کی بات' ریڈیو پروگرام میں بھی اندرا گاندھی کو خراج تحسین پیش کیا تھا۔ ''31 اکتوبر کو ہم نے بھارت کی سابق وزیر اعظم اندرا گاندھی کو کھو دیا۔ میں ان کو انتہائی احترام کے ساتھ خراج تحسین پیش کرتا ہوں۔''
خیال رہے کہ وزیر اعظم جمعہ کو دو روزہ دورے پر اپنی آبائی ریاست گجرات گئے ہوئے ہیں۔
کانگریس رہنما پرینکا گاندھی واڈرا نے ہفتہ کو شکتی استھل پر پہنچ کر سابق وزیر اعظم اندرا گاندھی کو ان کی 36 ویں برسی کے موقع پر خراج عقیدت پیش کیا۔
ملک کی پہلی اور اب تک کی واحد خاتون وزیر اعظم اندرا گاندھی کو ان کے محافظوں نے 31 اکتوبر 1984 کو گولی مار کر ہلاک کردیا تھا۔
اندرا گاندھی نے جنوری 1966 سے مارچ 1977 تک اور جنوری 1980 سے اپنی موت یعنی اکتوبر 1984 تک بھارت کے وزیر اعظم کے طور پر ملک کی خدمات انجام دی۔
