اگرحوصلے بلند ہوں تو کچھ بھی مشکل نہیں

دارالحکومت دہلی کے سنگم وہارعلاقے سے تعلق رکھنے والے رہنے والے نابد اختر نے جے ای ای مینس امتحان میں 92 فیصد نمبرات حاصل کرکے بڑی کامیابی حاصل کی ہے۔

تفصیل کے مطابق نابد نے ایسے حالات میں یہ کامیابی حاصل کی ہے جب ان کے پاس دیگر کورسز کے لیے امتحانات کی فیس جمع کرنے کے لیے بھی پیسے نہیں تھے اب ان کی خواہش ہے کہ انہیں دہلی کے کسی کالج میں داخلہ ملے تاکہ ان کے والدین کی پریشانیاں دورہو سکیں۔

نابد کا تعلق کسی بڑے مالدار گھرانے سے نہیں ہے لیکن اپنی بلند ہمت اور حوصلے کے سبب نابد نے بارہویں جماعت میں بھی 97 فیصد نمبر حاصل کیا تھا اوراب اسی شوق و لگن کو برقرار رکھتے ہوئے انہوں نے جے ای ای مینس کے مقابلہ جاتی امتحانات میں بھی 92 فیصد نمبرات سے کامیابی حاصل کی ہے۔

نابد کے والد آٹو رکشہ چلاکر اپنا گھر چلاتے ہیں، گذشتہ دنوں لاک ڈاؤن کےسبب معاشی بحران سے دوچار نابد کے والدین اپنے بیٹے کی کامیابی سے بے حد خوش ہیں۔

اگرحوصلے بلند ہوں تو کچھ بھی مشکل نہیں

ای ٹی وی بھارت سے بات کرتے ہوئے نابد کی والدہ نے بتایا کہ ہم نے تمام پریشانیوں کےباوجود اپنے بچوں کو تعلیم سے آراستہ کیا ہے اب ہم بھی چاہتے ہیں بچے اس قابل ہو جائیں تاکہ ہماری پریشانیاں کارآمد ہو۔