'اردو محبت کی زبان ہے'

جشن بہارٹرسٹ کی جانب سے دہلی میں ایک بین الاقوامی مشاعرہ کا اہتمام کیا گیا۔ اس میں ملک و بیرون ملک سے آئے شاعروں نے اپنا کلام پیش کیا۔

مشا‏عرے میں سامعین بہتر اشعار سے لطف اندوز ہوئے اور داد و تحسین سے شاعروں کو نوازا۔

اس سے قبل جشن بہار کی روح رواں کامنا پرساد نے استقبالیہ کلمات پیش کیے اور کہا کہ 'اردو گاندھی وادی ہے، محبت کی زبان ہے، امن واتحاد کی بات کرتی ہے۔ مذہبوں کو زبان درکار ہے لیکن زبانوں کا کوئی مذہب نہیں ہوتا۔'

مشاعرے میں دہلی کے نائب وزیراعلی منیش سسودیا نے کہا کہ 'ایسے بہارکے موسم میں مشاعرہ کرنا بڑی بہادری کی بات ہے۔ ان کا اشارہ اقتصادی بحران کی طرف تھا۔'

انہوں نے مزید کہا کہ 'دہلی جیسے ہندوستان کا دارالحکومت ہے ویسے ہی اردو کا بھی دارالحکومت ہے۔ اردوئے معلی بھی یہیں سے ہے اور اردوبازار بھی یہیں ہے۔'

جامعہ ملیہ اسلامیہ کی پہلی خاتون وائس چانسلر محترمہ نجمہ اختر نے ادبی جشن میں بحیثیت مہمان ذی وقار شرکت کرتے ہوئے کہا کہ 'جشن بہار مشاعرہ ہمارے مشترکہ ثقافتی ورثے کا جشن ہے۔ اردو اپنے آغاز سے ہی ہندوستان کی سیکولر اقدار کی حفاظت کررہی ہے۔'

مشاعرے کو کامیاب بنانے والے ممتاز شعرا و شاعرات میں بیرون ملک واشنگٹن سے ڈاکٹر عبداللہ، ہیوسٹن سے ڈاکٹرنوشہ اسرار، دوحہ قطرسے عزیز نبیل اور ابوظہبی سے سیدسروش آصف، جب کہ ملک ہندوستان سے پروفیسر وسیم بریلوی، ڈاکٹر نصرت مہدی، اقبال اشہر، عقیل نعمانی، پروفیسر مینو بخشی، لیاقت جعفری، پروین کیف، ڈاکٹر نزہت انجم، عبدالرحمن منصور، مدن موہن دانش، اظہراقبال، ندیم شاد اور ناظم مشاعرہ آلوک شریواستوقابل ذکر ہیں۔

میرٹھ سے تعلق رکھنے والے شاعر اظہر اقبال نے بڑی خوبصورتی سے پڑھا۔

'جنوں کم ہے تومجھ سے شاعری کم ہو رہی ہے
تمہیں پاکر میری دیوانگی کم ہو رہی ہے'

اس کے بعد آلوک شری واستو نے دہلی کی روایتی شاعری کو بنارس تک لے گئے اور خوبصورت اشعار پڑھے۔

ابوظہبی سے آئے سید سروش آصف نے پڑھا۔

'مجھ میں کوئی مجھ ساہو ایسا بھی ہو سکتا ہے
یا پھر کوئی اور چھپا ہو ایسا بھی ہو سکتا ہے۔

مشاعرے میں بزرگ شاعر پروفیسر بریلوی نے پروقاری شاعری کرتے ہوئے کہا

'ٹھوکروں کو بھی نہیں ہوتی ہراک سر کی تلاش
کسے آتا ہے سجدہ کرنا دعاوں کے ساتھ'

-پروفیسروسیم بریلوی

معمولی سے اک بشرہو تم عبداللہ
دنیا کے جھگڑے تم سے کیسے نپٹیں گے
اس لیے تم میری مانو
اپنے کام سے کام رکھو اور چادر اوڑھ کے لمبی تانو!
-ڈاکٹر عبداللہ عبداللہ

اک کمزور دیے نے تو اجالا بخشا
دیکھنا یہ ہے، اجالے نے کسے کیا بخشا
-ڈاکٹر نوشہ اسرار

بکھر چکا ہے تعلق، کسا و مشکل ہے
چلو ہٹاؤ کہ اب رکھ رکھاؤ مشکل ہے
-ڈاکٹر نصرت مہدی

مجھ میں کوئی مجھ جیسا ہو ایسا بھی ہو سکتا ہے
یا پھر کوہی اور چھپا ہو ایسا بھی ہو سکتا ہے
-سید سروش آصف

بے فیض اک چراغ بتایا گیا مجھے
سورج بجھا تو ڈھونڈ کے لایا گیا مجھے
ابھرا ہراک بار نیا پھول بن کے میں
مٹی میں جتنی بار ملایا گیا مجھے
-اقبال اشہر

خوشی یہ ہے کہ میں سورج کی دستک سن رہا ہوں
قلق یہ ہے چراغوں سے جدا ہونا پڑے گا
-عقیل نعمانی

سانس لیتا ہوا ہر رنگ نظر آئے گا
تم کسی روز میرے رنگ میں آؤ تو سہی
-عزیز نبیل

رسم وفا نبھانا تو غیرت کی بات ہے
وہ مجھ کو بھول جائے یہ حیرت کی بات ہے
-ڈاکٹر نزہت انجم

بڑھا کر ہاتھ ساری حد مٹا دے
زمینوں کے کشادہ قد مٹا دے
کبھی بچے کو نقشہ مت دکھانا
نہ جانے کون سی سرحد مٹا دے
-لیاقت جعفری

کیوں پریشاں نظر آتے ہیں تیرے شہر کے لوگ
جب کبھی ہم تیری محفل میں نظر آتے ہیں
-پروفیسر مینو بخشی

دوپہر مسجد میں یہ اعلان فرمایا گیا
ایک بچہ رہ رہا ہے، جن کا ہے لے جائیے
دوڑ کر بدلو میاں پہنچے مؤذن سے کہا
جن کا بچہ کیسے ہوتا ہے ہمیں دکھلائیے
-عبدالرحمن منصور

اور کیا آخر تجھے اے زندگی چاہیے
آرزو کل آگ کی تھی، آج پانی چاہیے
-مدن موہن دانش

دل کے ہیں برے لیکن اچھے بھی تو لگتے ہیں
ہر بات سہی جھوٹی، سچے بھی تو لگتے ہیں
-پروین کیف

چہکتے گھر مہکتے کھیت اور وہ گاؤں کی گلیاں
جنہیں ہم چھوڑ آئے ان سبھی کہ جیتے رہتے ہیں
-آلوک شریواستو

جنون کم ہے تو مجھ سے شاعری کم ہو رہی ہے
تمہیں پاکر میری دیوانگی کم ہو رہی ہے
-اظہر اقبال

چاہے سب کھوجائے لیکن ان کو مت کھونا
جن کو تیری آنکھ کا آنسو دریا لگتا ہے
-ڈاکٹرندیم شاد