پروفیسر محمد افسر عالم، وائس چانسلر جامعہ ہمدرد نے کہا ہے کہ یونیورسٹی کے بانی حکیم عبد الحمید کے خوابوں کو پورا کرتے ہوئے یونیورسٹی کو تعلیم و تحقیق میں سرخیل بناکر’ نیشنل اسسمنٹ اینڈ ایکریڈیشن کونسل‘ (این اے اے سی) سے اعلیٰ گریڈ حاصل کرنا ہدف ہے۔
جامعہ ہمدرد کے نومنتخب وائس چانسلر پروفیسر افسرعالم نے منگل کے روز کہا کہ یونیورسٹی کورونا وائرس سے پیدا ہونے والے چیلنجوں کے باوجود اپنا تعلیمی پروگرام آسانی سے چلانے میں کامیاب رہی ہے۔ انہوں نے کہاکہ ان کی پہلی ترجیح یونیورسٹی کے لیے این اے اے سی میں اے + گریڈ حاصل کرنا ہے اور اس کے لیے ان کی تیاری کے لیے ایک برس کا وقت ہے۔ انہوں نے کہاکہ یونیورسٹی میں ڈینٹل کالج قائم کرنے کا بھی منصوبہ ہے۔
نئی تعلیمی پالیسی کی تعریف کرتے ہوئے انہوں نے کہا کہ اس سے تعلیم کے معیار میں اضافہ ہوگا۔ نئی تعلیمی پالیسی کے تحت جامعہ ہمدرد مختلف کورسوں میں مختلف مضامین کے لیے ملٹی انٹری اور ملٹی ایکزٹ سسٹم پر کام کررہی ہے۔ کورسز کو کثیر الشعبہ بنانے کے لیے تیز رفتاری سے کام جاری ہے تاکہ نئی تعلیمی پالیسی کے مختلف پہلوؤں کو عملی جامہ پہنانے میں آسان ہوسکے۔ یہ پالیسی بچوں کی صلاحیتوں کو بہتر بنانے اورکتابی علم کے ساتھ عملی علم کے حصول میں بھی مددگار ثابت ہوگی۔ کورونا وبا کے دوران آن لائن تعلیم کی اہمیت میں اضافہ ہوا ہے، لہذا یونیورسٹی اسے اور بھی بہتر بنانے کے لیے مستقل کوششیں کررہی ہے۔
یواین آئی
