دارالحکومت دہلی کے لیفٹیننٹ گورنر انل بیجل نے آج دہلی کے ڈیزاسٹر مینجمنٹ اتھارٹی کو کورونا وبا کے انتظامات کے مختلف پہلوؤں پر مشورے دینے کے لیے ایک اعلی سطح کی تجربہ کار مشاورتی کمیٹی تشکیل دی ہے۔
لیفٹیننٹ گورنر کے ذریعہ تشکیل کردہ مشاورتی کمیٹی میں ڈیزاسٹر مینجمنٹ سے وابستہ ممتاز ماہرین کو نامزد کیا گیا ہے۔ یہ مشاورتی کمیٹی چھ ممبروں پر مشتمل ہے۔
جس میں نیشنل ڈیزاسٹر مینجمنٹ اتھارٹی کے ممبر کرشنا وتس، کمل کشور، آئی سی ایم آر کے ڈائریکٹ جنرل بلرام بھارگو، ایمس کے ڈائریکٹر رندیپ گولیریا، ڈی جی ایچ ایس کے ایڈیشنل ڈائریکٹر جنرل ڈاکٹر رویندرن اور این سی ڈی سی ڈائریکٹر ڈاکٹر سجیت کمار سنگھ شامل ہیں۔
یہ تجربہ کار مشاورتی کمیٹی کورونا کے پھیلاؤ کو روکنے اور کورونا وبا کی وجہ سے دہلی میں پیدا ہونے والے چیلنجوں سے نمٹنے اور طبی انفراسٹرکچر کو بڑھانے کے اقدامات پر اپنی رائے دے گی۔
یہ کمیٹی کورونا کے خلاف موثر جنگ کے لیے عالمی اور قومی سطح پر اٹھائے گئے بہترین اقدامات اور مثالوں کو بھی پیش کرے گی۔
لیفٹیننٹ گورنر نے کہا کہ دہلی ڈیزاسٹر مینجمنٹ اتھارٹی کی جانب سے عالمی وبائی مرض کے چیلنج پر قابو پانے کے لیے جو کوششیں کی جارہی ہیں ان میں جدید ایجنسیوں کے مابین موثر منصوبہ بندی، موثر مانیٹرنگ اور کوآرڈینیشن کو بڑھایا جانا چاہئے۔
