گڈکری نے راجستھان میں 18 سڑک منصوبوں کا سنگ بنیاد رکھا

وزیر روڈ ٹرانسپورٹ اینڈ ہائی ویز نتن گڈکری نے جمعرات کے روز راجستھان میں 18 روڈ پروجیکٹس کا سنگ بنیاد رکھا اور کہا کہ ریاست کے تمام اضلاع اب قومی شاہراہ سے منسلک ہوگئے ہیں۔

ویڈیو کانفرنسنگ کے ذریعے ان منصوبوں کا سنگ بنیاد اور افتتاح کرتے ہوئے گڈکری نے کہا کہ ان منصوبوں پر 8500 کروڑ لاگت آنے کی توقع ہے اور ریاست ان کی تعمیر کے بعد 1127 کلومیٹر اسٹیٹ ہائی ویزسے جڑجائے گی۔ اس سے ریاست میں روڈ نیٹ ورک مستحکم ہوگا اور آمدورفت و سامان کی نقل و حمل آسان ہوگی۔

انہوں نے کہا کہ اس سے ریاست میں سیاحت اور صنعتی ترقی کو فروغ ملے گا نیزاسٹریٹجک اہمیت کےڈھانچہ جاتی ترقیاتی منصوبوں سے سرحدی علاقوں میں ٹریفک میں بہتری آئے گی۔ ان منصوبوں سے زرعی پیداوار، مقامی اور دیگر مصنوعات کی بڑی منڈیوں تک رسائی بھی آسان ہوگی۔

مرکزی وزیر نے کہا کہ حکومت وزیر اعظم نریندر مودی کی سربراہی میں راجستھان کو خوشحال بنانے کے لیے پرعزم ہے۔ انہوں نے اس دوران ریاست میں زیر تعمیر منصوبوں کے ساتھ ہی مستقبل میں منصوبہ بند پروجیکٹس میں سے 50 ہزار کروڑ کے مجموعی 22 منصوبوں کا بھی اعلان کیا اور کہا کہ ان منصوبوں پر جلد کام شروع کیا جائے گا۔

اس موقع پر وزیراعلیٰ اشوک گہلوت، سابق وزیر اعلی وسندھرا راجے سندھیا ، روڈ ٹرانسپورٹ اینڈ ہائی ویز کے وزیر مملکت وی کے سنگھ، مرکزی وزیر گجندر سنگھ شیخاوت، ارجن میگھوال ، کیلاش چودھری اور دیگر معززین موجود تھے۔

یو این آئی