دہلی حکومت نے نائب وزیر اعلیٰ منیش سسودیا کو اہم ذمہ داری دیتے ہوئے دارالحکومت میں تیزی سے بڑھ رہے کورونا انفیکشن کے پھیلائو کو روکنے کےلئے کووڈ19 انتظامیہ کا نوڈل وزیر مقرر کیا ہے۔
وزیر اعلیٰ اروند کیجریوال نے اس سلسلے میں ایک حکمنامے پر دستخط کئے ہیں جس کے مطابق سسودیا اب دارالحکومت میں کووڈ-19 انتظامیہ کے لئے نوڈل وزیر کے طور پر کام کریں گے اور اگلے حکم تک بین وزارتی تال میل کی ذمہ داری بھی سنبھالیں گے۔
دارالحکومت میں تیزی سے بڑھ رہے کورونا انفیکشن کے درمیان جمعرات کو کورونا کے 16,699 نئے معاملے سامنے آئے تھے اور اس وبا کی وجہ سے 112 اورلوگوں کی موت ہوئی تھی۔
قابل ذکر ہے کہ دارالحکومت دہلی میں کافی تیزی سے بڑھ رہے کورونا انفیکشن کو مزید پھیلنے سے روکنے کے لئے آج رات دس بجے سے ہفتے کے آخری دو دنوں میں کرفیو نافذ ہو جائے گا۔
دارالحکومت میں کورونا انفیکشن کی روک تھام کے لئے دہلی حکومت کی جانب سے جاری کردہ رہنما خطوط کے مطابق ہفتے کے آخر میں کرفیو کے دوران لازمی خدمات میں شامل افراد کے علاوہ شادی کی تقریب میں شرکت کرنے والوں کے لئے بھی کرفیو پاس جاری کیے جائیں گے۔ اس دوران، دہلی میں آڈیٹوریم، مال، جم اور اسپا مکمل طور پر بند ہو جائیں گے۔ تھیٹروں کو 30 فیصد صلاحیت کے ساتھ چلنے کی اجازت دی گئی ہے۔
ضروری خدمات سے وابستہ افراد کو کرفیو پاس جاری کیے جائیں گے، لوگوں کو ریستورانوں میں بیٹھ کر کھانا کھانے سے منع کیا جائے گا اور صرف گھر کھانا لے جانے کی اجازت ہوگی۔
