دارالحکومت دہلی میں کورونا وائرس سے متأثرہ مریضوں کی تعداد میں مسلسل اضافہ ہو رہا ہے لیکن اگر ہم دلی کے وزیر صحت ستیندر جین کے بات پر یقین کریں تو دہلی میں کورونا وائرس سے متأثر افراد کی تعداد میں کمی آئی ہے۔
دہلی کے وزیر صحت ستیندر جین نے آج صحافیوں سے خطاب کرتے ہوئے بتایا کہ اب دہلی میں کورونا وائرس سے متأثر مریضوں کی تعداد میں کمی آئی ہے.
انہوں نے بتایا کہ گذشتہ دنوں میں 3 سے 4 روز میں مریضوں کی تعداد دوگنا ہو رہی تھی لیکن اب یہ تعداد 12 روز میں دوگنا ہو رہی ہے.
ایسے میں ہم یہ تو نہیں کہ سکتے کہ دہلی میں حالات قابو میں ہیں لیکن یہ کہنا بھی درست نہیں ہے کہ حالات قابو سے باہر ہیں.
ایک سوال کے جواب میں وزیر صحت نے بتایا کہ جب لاک ڈاؤن نافذ کیا گیا تھا تو اس دوران ہمیں نہیں معلوم تھا کہ یہ بیماری کب تک چلے گی لیکن اب یہ سمجھ آگیا ہے کہ یہ وبا مہینے دو مہینے کی نہیں ہے بلکہ ہمیں اس وبا سے لمبی جنگ لڑنے کی ضرورت ہے.
قابل ذکر ہے کہ دہلی میں اب تک تقریباً ساڑھے 8 ہزار کیسز کی تصدیق کی جاچکی ہے جبکہ مرنے والوں کی تعداد حکومتی اعدادوشمار کے مطابق 109 بتائی جا رہی ہے.
