کل ہند مجلس اتحاد المسلمین کے ریاستی صدر کلیم الحفیظ نے کہاکہ دہلی حکومت بتائے کہ اردو اکیڈمی کو اردو داں وائس چیئرمین کب ملے گا، بجٹ کب ریلیز کی جائے گی؟ اور خالی پڑی 27 پوسٹ کب پر ہوں گی؟ ڈی ایس ایس بی سے نکالی گئی آسامیوں کو دہلی اردو اکیڈمی سے جوڑ کر سرکار اکیڈمی کو اشتہار کے لیے استعمال نہ کرے۔'
کلیم الحفیظ نے کہاکہ آخر دہلی کے نائب وزیر اعلی اردو اکیڈمی کو لے کر منہ میں دہی جما کر کیوں بیٹھے ہیں، ڈی ایس ایس بی کے ذریعے جو اردو اساتذہ کی پوسٹ نکالی گئی ہیں ان کو بھرنے کے لیے دہلی سرکار کیا قدم اٹھا رہی ہے؟ کیا اردو اکیڈمی کا کام سرکار کے لیے اشتہار بازی کرنا ہے یا اردو ادب شاعروں ادیبوں اور اردو کے فروغ کے لیے کام کرنا ہے؟ سرکار بتائے اس نے اردو کے کوالیفائیڈ ٹیچر تیار کرنے کے لیے کیا لائحہ عمل تیار کی ہے؟ مجلس اتحاد المسلمین نے اردو اکیڈمی کا مسئلہ اٹھایا ہے سرکار اردو اکیڈمی سے متعلق اصلاحات کرنے کے بجائے جو کام ہوا ہی نہیں اور ہونا ہے اس کا ڈھنڈورا پیٹنا کیوں چاہتی ہے؟
کلیم الحفیظ نے کہاکہ دہلی سرکار کے شعبہ تعلیم کی جانب سے جو اردو اساتذہ کی آسامیاں نکالی گئی ہیں ان کا اردو اکیڈمی سے کوئی تعلق نہیں ہے۔ ان کو اکیڈمی کی خالی آسامیوں سے خلط ملط نہ کیا جائے۔
صدر مجلس نے یہ بھی مطالبہ کیا کہ مجلس کے ذریعے اٹھائے گئے مسئل پر دہلی سرکار سنجیدگی سےکام کرے اور جلد از جلد اکیڈمی کی ذمہ داری کسی اردو داں کو دے اور یہ بات یاد رکھے کہ مجلس اردو اکیڈمی سمیت تمام اقلیتی اداروں کے کام کاج پر نظر رکھے گی اور تمام معاملات کا تعاقب کرے گی'۔
