دہلی کی منڈولی جیل میں کورونا وائرس سے موت کا پہلا معاملہ سامنے آیا ہے جس میں ایک عمر دراز قیدی کی کورونا وائرس سے موت ہو گئی ہے۔ اس قیدی کی عمر 62 برس تھی۔
تہاڑ جیل کے ترجمان نے بتایا کہ قیدی کی موت پندرہ جون کو ہوئی تھی جس کے بعد اس کا کورونا ٹیسٹ کروایا گیا جس کی رپورٹ مثبت آئی۔
قیدی کی رپورٹ مثبت آنے سے جیل میں ہنگامہ برپا ہو گیا جس بیرک میں قیدی کو رکھا گیا تھا اس میں مزید اٹھائیس قیدی موجود تھے۔ اب انتظامیہ ان سبھی اٹھائیس قیدیوں کی کورونا جانچ کروا رہا ہے۔
واضح رہے کہ اب تک دہلی کی مختلف جیلوں میں کورونا کے کئی معاملے سامنے آئے ہیں لیکن یہ پہلا معاملہ ہے جس میں قیدی کی کورونا سے موت ہوئی ہے۔
