اتوار کے روز دربھنگہ شہر کے بازار سمیتی چوک پر لکی ٹریڈرس کے احاطے میں انصاف منچ کے ضلع کارکنان کنونشن کا آغاز ہوا۔ وہیں، کووڈ-19 سے مرنے والوں کو یاد کرتے ہوئے کینڈل جلا کر انھیں خراج عقیدت پیش کیا گیا۔
اس موقع پر منعقد تقریب سے خطاب کرتے ہوئے بھاکپا مالے ریاستی کمیٹی کے رکن ابھیشیک کمار نے کہا کہ کوڈ وبا کے دوران حکومت کی لاپرواہی اور لچر صحت خدمات کے سبب لاکھوں افراد تڑپ تڑپ کر آکسیجن، بیڈ، آئی سی یو اور دوائیوں کی کمی کی وجہ سے جان گنوا چکے ہیں۔
منچ کے ریاستی نائب صدر نیاز احمد نے کہا کہ کورونا وائرس جیسی مہلک وبا میں جب حکومت نے اپنا ہاتھ کھینچ لیا تو لوگوں نے ایک دوسرے کی مدد کی۔ وائرس اور فنگس جیسی مہلک وبا میں آکسیجن، بیڈ اور آئی سی یو کی کمی نے غریبوں کو موت کے گھاٹ اتار دیا۔ پھر بھی مرکزی و ریاستی حکومتوں کو احساس ندامت نہیں ہوا۔
پارٹی کے نومنتخب سیکریٹری مقصود عالم عرف پپو خان نے کہا کہ ہمیں جو ذمہ داری ملی ہے، اگر آپ لوگوں کا تعاون حاصل رہا تو پوری ایمانداری سے مضبوطی کے ساتھ زمینی سطح پر پارٹی کو مضبوط کرونگا۔
یہ بھی پڑھیں: دربھنگہ: محمد عادل بلال کی بی پی ایس سی میں شاندار کامیابی
وہیں نومنتخب صدر اکبر رضا نے کہا کہ موجودہ دور میں پورے ملک میں دلتوں کمزوروں اقلیتوں پر جابجا ظلم ہو رہا ہے اور حکومت خاموش تماشائی بنی ہوئی ہے۔ انصاف منچ ایسے لوگوں کی مدد کے لئے تیار ہیں اور ہر سطح پر دلتوں اقلیتوں کے حقوق کی لڑائی لڑے گی۔
اس تقریب میں بھاکپا مالے کے ریاستی رکن ابھیشیک کمار، دربھنگہ آئیسا ضلع کمیٹی کے سکریٹری مینک یادو انصاف منچ کے نو منتخب ضلع سیکرٹری مقصود عالم عرف پپو خان، صدر اکبر رضا وہیں محمد جمشید لچھمن پاسوان ضیاء الدین ساحل منوج پاسوان قربان علی رشیدہ خاتون شیام بھروس سنگھ محمد شہزاد محمد ارشاد وغیرہ موجود تھے۔
