بھارتی جنتا پارٹی کی سینیئر رہنما اوما بھارتی نے امریکہ میں نائب صدر کے عہدے کی امیدوار کملا ہیرس کی تعریف نہ کرنے کی اپیل کی ہے۔
انہوں نے کہا کہ کملا ہیرس بھارتی نہیں ہیں، وہ امریکہ میں پیدا ہونے والی ایک خاتون ہیں لہذا وہ صرف امریکی نژاد خاتون ہیں۔اس لیے بھارت کے لوگوں کو کملا ہیرس کے سوا ملک کی ان خواتین پر فخر کرنا چاہئے جنہوں نے سیاست میں اپنا ایک الگ مقام بنایا ہے۔
اوما بھارتی نے مزید کہا کہ بھارتی عوام اس لیے خوش ہے کیونکہ انہیں امریکہ میں نائب صدر کا امیدوار بنایا گیا ہے، لیکن میں یہ کہنا چاہتی ہوں کہ کملا ہیریس کی وفاداری امریکہ سے ہے۔وہ بھارت کے لیے وقف نہیں ہیں لہذا ہمیں ان ہندوستانی خواتین کی تعریف کرنی چاہئے جو ہندوستان کے لیے وقف ہیں۔
اوما بھارتی نے کہا کہ ہندوستان میں ایسی بہت سی خواتین ہیں جنہوں نے بیرون ملک میں ہندوستان کا نام بلند کیا، سیاست کے میدان میں اندرا گاندھی اور سشما سوراج جیسی خواتین نے پوری دنیا میں اپنے ملک کا نام روشن کیا ہے لہذا ہمیں اپنے ملک کی خواتین پر فخر کرنا چاہئے۔
واضح رہے کہ ڈیموکریٹک پارٹی نے گزشتہ ہفتے منعقد ہونے والے اپنے پہلے ورچوئل ڈیمو کریٹک نیشنل کنونشن میں صدر اور نائب صدر امیدواروں کے طور پر اعلان کردیا ہے جس میں کملا ہیرس پہلی سیاہ خاتون ہیں، جنھیں پہلی ہند نژاد امریکی اور ایشیائی امریکی کے طور پر نائب صدارتی دوڑ کے لئے نامزد کیا ہے۔
