ٹریکٹر کی ٹکر سے دو بھائیوں کی موت، ایک زخمی

ریاست مدھیہ پردیش کے ضلع رائے سین میں ٹریکٹر اور موٹر سائیکل کے مابین ٹکر میں دو سگے بھائی ہلاک ہو گئے جبکہ ایک اور شخص زخمی ہو گیا۔

مدھیہ پردیش کے ضلع رائے سین کے سانچی تھانہ علاقہ میں پیر کو موٹر سائیکل سوار تین لوگوں کو ایک ٹریکٹر نے ٹکر ماردی، جس سے دو کی موقع پر ہی موت واقع ہوگئی اور ایک سنگین طور پر زخمی ہوگیا۔ ہلاک ہونے والے دونوں سگے بھائی بتائے گئے ہیں۔

پولیس ذرائع کے مطابق موضع مرمٹا کے رہائشی 21 سالہ سہدیو مہرا اپنے چھوٹے بھائی 16 سالہ روہت مہرا اور ایک دیگر شخص کے ساتھ موٹر سائیکل پر سوار تھے تبھی ایک تیز رفتار ٹریکٹر-ٹرالی نے ان کی بائیک کو پیچھے سے ٹکر مار دی۔

حادثہ میں سہدیو اور اس کے چھوٹے بھائی روہت کی موقع پر ہی موت واقع ہوگئی، جبکہ تیسرا سنگین طور سے زخمی ہوگیا، جسے اسپتال لے جایا گیا ہے۔

پولیس نے ٹریکٹر ڈرائیور کے خلاف مقدمہ درج کرکے تفتیش شروع کر دی ہے۔