ریاست مدھیہ پردیش کے دارالحکومت بھوپال میں بھارتی کمیونسٹ پارٹی کے زیر اہتمام پریس کانفرنس کا انعقاد کیا گیا، جس میں مدھیہ پردیش کی کانگریس حکومت پر ناراضگی کا اظہار کیا گیا۔ دراصل بھارتی کمیونسٹ پارٹی شہریت ترمیمی قانون کے خلاف بڑا احتجاج کرنا چاہتی تھی پر صوبے میں دفعہ 144 نافذ ہونے کی وجہ سے بھارتی کمیونسٹ پارٹی کو اجازت نہیں دی گئی۔
اس موقع پر بھارتی کمیونسٹ پارٹی کے رہنما راکیش سنگھ نے کہا کہ مرکزی حکومت نے جو قانون بنایا ہے یہ آئین پر ایک طرح کا حملہ ہے۔ ملک کے لوگوں کو مذہب کے نام پر تقسیم کیا جا رہا ہے۔ انہوں نے کہا جو حکومت ہمارے ووٹوں سے منتخب ہو کر آئی ہے، وہ اب ہم سے شہریت کا ثبوت مانگ رہی ہے۔
انہوں نے مزید کہا کہ ملک مصیبت کے دور سے گزر رہا ہے۔ بے روزگاری، مندی اور دیگر مسائل ملک میں ہیں اور حکومت این آر سی کے نام پر پیسہ خرچ کر رہی ہے جس سے ملک اور کمزور ہوتا جا رہا ہے۔
