مدھیہ پردیش کے چنمب ڈیویژن کے مرینا ضلع میں آن بان اور شان کی علامت مانی جانے والی ’بندوق‘ریاست میں ہورہے ضمنی انتخابات میں ضابطہ اخلاق نافذ رہنے تک پولیس اور آرمس ڈیلروں کے قبضے میں رہیں گی۔
کلیکٹر اور ضلعی الیکشن افسر انوراگ ورما نے مرینا ضلع کے چھ اسمبلی حلقوں میں سے پانچ پر ہونے والے ضمنی انتخابات کے پرامن طریقےسے منصفانہ طورپر کرائے جانے کے پیش نظر ضلع کے سبھی 27 ہزار لائسنسی ہتھیاروں کو آرمس ڈیلر اورپولیس کے مال خانوں میں چھ اکتوبر تک جمع کرائے جانے کا حکم دیا تھا۔
سرکاری ذرائع کے مطابق کل پانچ اکتوبر تک تقریباً 14 ہزار بندوق مال خانوں میں جمع کرائی جاچکی ہیں۔ آج چھ اکتوبر آخری تاریخ کو ضلع اور سب ڈیویژن ہیڈکوارٹروں پر لائسنسی بندوق رکھنے والوں کی صبح سے ہی آرمس ڈیلروں اور پولیس تھانوں کے سامنے لمبی لمبی قطاریں لگی ہیں۔
ضلع مجسٹریٹ ورما نے وارننگ دی ہے کہ مقررہ تاریخ تک لائسنسی ہتھیار جمع نہیں کرائے گئے تو لائسنس ہولڈروں کے لائسنس فوری اثر سے مسترد کرکے ضبط کرلئے جائیں گے۔ کلیکٹر نے ان لائسنسی ہتھیار رکھنے والوں کو ہتھیار رکھنے کی چھوٹ دی ہے جنہیں اپنی جان کا خطرہ ہے۔
