کووڈ۔19 کے پیش نظر اور اس کے انفیکشن کے پھیلاو کو روکنے کے لیے ریاست مدھیہ پردیش میں پندرہ روزہ کِل کورونا مہم کا آغاز آج سے کیا گیا ہے۔
کِل کورونا مہم ایک جولائی سے 15 جولائی چلائی جائے گی جس کے تحت ریاست کے تمام اضلاع میں وائرس پر قابو پانے کے ساتھ ساتھ صحت بیداری مہم میں حکومت اور سماج کے ساتھ مل کر کام کریں گے۔
وزیراعلیٰ شیوراج سنگھ چوہان نے عوام سے اپیل کی ہے کہ کِل کورونا مہم کے تحت گھر گھر پہنچنے والی سروے ٹیم کو ضروری معلومات دے کر اپنا تعاون دیں اور ریاست کو کورونا سے پاک کریں۔
انھوں نے کہا کہ اس مہم میں کھانسی اور زکام کے ساتھ ساتھ ڈینگی، ملیریا، ڈائریا وغیرہ کی علامات کے پائے جانے پر بھی ضروری مشورے اور علاج فراہم کیا جائے گا۔
وزیراعلی نے اس مہم کے دوران کام کرنے والوں کو سماجی فاصلہ برقرار رکھنے کی بھی اپیل کی ہے۔
انہوں نے مزیدکہا کہ ریاست سے کورونا وائرس کو ختم کرکے ہی میں چین کی سانس لوں گا۔
اس مہم کو عملی جامہ پہنانے کے لیے ڈور ٹو ڈور سروے کے ذریعے ریاست میں 11458 ٹیم تشکیل دی جائے گی اور تمام ٹیم کو ضروری آلات بھی مہیا کرائی جائیں گی۔
