مدھیہ پردیش کے ضلع گونا کے سرسی تھانہ حلقہ میں ایک حاملہ خاتون کے کندھے پر دیور کو بیٹھا کر تین کلو میٹر چلانے کا سنسنی خیز معاملہ سامنے آیا ہے۔
اس دوران خاتون کو کرکٹ کے بللے سے مارا بھی جا رہا ہے۔ اس واردات کی فوٹو اور ویڈیو سوشل میڈیا پر وائرل ہونے کے بعد سے علاقے میں سنسنی پھیل گئی ہے۔
واردات کے متعلق بتایا جا رہا ہے کہ یہ واردات خاتون کے سسرال والوں کے ذریعہ انجام دی گئی ہے، حالانکہ پولیس نے معاملے میں چار افراد کے خلاف مار پیٹ کی دفعات کے تحت ایف آئی آر درج کیا ہے۔
بموری اسمبلی حلقہ کے گرام پنچایت رائے کے تحت گاؤں ڈگڈفلہ کے رہائشی بھیل سماج کی رہائشی متاثرہ خاتون نے بتایا کہ اس کی شادی بانسکھیڑی باشندہ ایک نوجوان سے ہوئی تھی۔ بعد میں وہ دوسرے نوجوان کے ساتھ رہنے لگی۔
خاتون نے کہا کہ اس کے شوہر نے اسے چھوڑنے کی بات کہی تھی، اس لئے وہ دوسرے نوجوان کے ساتھ رہنے لگی تھی۔ تقریباً ایک ماہ سے وہ اور نوجوان ساتھ رہ رہے تھے، جس کی اطلاع اس کے سسرال والوں کو ملی تو حال ہی میں خاتون کے سسرال والے سسر، جیٹھ اور سسر کے دیگر بیٹے تقیرباً آٹھ کی تعداد میں لوگ موٹر سائکل سے خاتون کے ساگئی گاؤں واقع گھر پہنچے اور مار پیٹ کی۔
واردات کے وقت خاتون کے ساتھ رہنے والا نوجوان مزدوری کے لئے گھر سے باہر گیا ہوا تھا اور خاتون گھر پر اکیلی تھی۔
پولیس میں درج شکایت میں خاتون نے بتایا کہ مار پیٹ کے بعد سسرال والوں نے اس کے دیور کو اس کے کندھے پر بٹھا دیا۔ اس کے بعد باسکھیڑی گاؤں یعنی خاتون کے سسرال چلنے کو کہا۔ یہ راستہ تقریباً 3 کلومیٹر کا ہے۔ جب خاتون نے اس کی مخالفت کی تو اس کے ساتھ زبردستی کرنے کی کوشش کی گئی۔
خاتون نے بتایا کہ اسے کرکٹ کے بللے سے مارتے ہوئے لے جایا گیا۔ اس معاملے کی دو تین ویڈیو سوشل میڈیا پر وائرل ہوئی ہے۔ سرسی پولیس نے مار پیٹ کی دفعات کے تحت خاتون کے سسرال کے چار افراد کے خلاف معاملہ درج کیا ہے۔
