ممبئی سے لوٹنے والا محمد اکرام ان بدقسمت مہاجر مزدوروں میں سے ایک ہے جو گزشتہ کئی دنوں سے بھوکا پیاسا سفر کر رہا ہے لیکن ابھی تک اپنی منزل تک نہیں پہنچ سکا ہے۔
دراصل محمد اکرام خصوصی ٹرین سے ممبئی سے دربھنگہ کے لئے روانہ ہوا تھا لیکن ریل گاڑی کٹیہار پہنچ گئی اور کٹیہار سے ان لوگوں کو دربھنگہ پہنچانے کے بجائے بھاگلپور پہنچا دیا گیا حالانکہ بھاگلپور سے دربھنگہ روٹ کی کوئی بس ہی نہیں ہے۔ ایسے میں وہ اور ان کے ساتھی حیران و پریشان ہیں۔
اپنے ضلع کے گیارہ ساتھیوں کے ساتھ بھاگلپور پہنچے اکرام اور ان کے ساتھیوں نے بتایا کہ جہاں یہ لوگ کام کرتے تھے، لاک ڈاؤن کے دوران فیکٹری مالک نے انہیں نکال دیا۔ ان کے کمائے پیسے بھی نہیں دیے۔
انہوں نے بتایا کہ سفر کے دوران مدھیہ پردیش تک تو کھانا ملا لیکن یو پی اور بہار میں کہیں کھانا نصیب نہیں ہوا اور نہ ہی ان لوگوں کے پاس اتنے پیسے ہیں کہ وہ گاڑی ریزرو کرکے اپنے گھر پہنچ سکیں۔
مخلتف ریاستوں سے بہار پہنچنے والے ہزاروں مزدوروں کی یہی درد بھری داستان ہے۔ خصوصی ریل گاڑیوں کو پہنچنا کہیں اور چاہئے لیکن وہ پہنچ کہیں اور جاتی ہیں۔ ایسے میں ان مزدوروں کو اپنی منزل تک پہچانے کی ذمہ داری ریاستی حکومت کی ہے لیکن افسران کی نا اہلی اور بے توجہی کے باعث ان بے چارے غریب مزدوروں کو در در بھٹکنا پڑ رہا ہے۔
