ریاست کرناٹک کے شہر بنگلور میں کورونا وائرس کے متاثرین میں تیزی سے اضافے کے سبب لاک ڈاون میں بھی اضافہ کیا جارہا ہے جس کی وجہ سے غریب و مزدور طبقہ میں بے روزگاری اور مشکلات سے دوچار ہورہے ہیں۔
کورونا وائرس کے سبب جاری لاک ڈاون میں بنگلور شہر کے السور علاقہ کی ایک مقامی سماجی تنظیم "کیشوا" ٹرسٹ کی جانب سے غریب معذور افراد میں مفت راشن کٹس تقسیم کیا گیا۔
اس موقع پر معذوروں کی تنظیم کیشوا ٹرسٹ کے کارکن چندرہ شیکھر نے کہاکہ مرکزی یا ریاستی حکومتوں کی جانب سے لاک ڈاؤن سے متاثر معذوروں کے لیے کوئی اسکیم ہی نہیں ہے اور انہیں جو ماہانہ 600 روپے معاوضہ بطور وظیفہ کے دیا جاتا تھا وہ بھی گزشتہ 5 مہینوں سے رکا ہوا ہے۔
کیشوا تنظیم کے صدر چنہ کیشوالو نے وزیر اعلیٰ یدیورپا سے گزارش کی ہے کہ وہ لاک ڈاؤن کے دوران بے روزگاری کے شکار معذوروں کے لیے جلد از جلد کسی پیکیج کا اعلان کریں۔
چنہ کیشوالو نے مزید کہا کہ مفت راشن کٹس تقسیم کرنے کی خدمت وہ ہر مہینہ کرتے ہیں اور انہیں اس کے لیے متعدد دوست و احباب کا تعاون بھی حاصل رہا ہے.
