کرناٹک ویمنس کانگریس ونگ کی صدر پشپا امرناتھ اور رکن اسمبلی گلبرگہ کنیز فاطمہ کی قیادت میں جگت سرکل گلبرگہ پر پکوان گیاس کی قیمتوں میں اضافے کے خلاف مرکزی حکومت کے خلاف احتجاجی مظاہرہ کیا گیا۔
احتجاجیوں نے حکومت کے خلاف اپنی ناراضگی کا اظہار کرتے ہوئے سڑک پر چائے بنائی۔ پشپا امرناتھ نے کہا کہ مرکزی حکومت کی مخالف عوام پالیسیوں کے خلاف ایک بڑے پیمانے پر احتجاج شروع کیا جائے گا۔
پکوان گیس کی قیمتوں میں اضافہ کے سبب خواتین آنسو بہا رہی ہیں ۔انھوں نے کہا کہ سابق میں گیس سلنڈرز کی قیمتوں میں ایک ساتھ اتنا زیادہ اضافہ نہیں دیکھا گیا تھا جبکہ عالمی سطح پر خام تیل کی قیمتوں میں گراوٹ ہوئی ہے لیکن یہاں ہمارے ملک میں پیٹرول اور ڈیزل کی قیمتوں میں اضافہ کردیا گیا ہے۔
ایل پی جی سلنڈر استعمال کرنے والوں کو جو سبسیڈی دی جارہی تھی وہ بھی صارفین کومطلع کیے بغیر روک دی گئی ہے۔ انھوں نے پوچھا کیا یہی مودی سرکار کے اچھے دن ہیں۔
