ریاست کرناٹک کے شہر بنگلور میں کورونا وائرس کی دوسری لہر میں آکسیجن کی قلت سے اموات کی تعداد میں مسلسل اضافہ ہورہا ہے، ان حالات میں لوگوں کی قیمتی جانوں کو بچانے کی غرض سے شہر بنگلور کے سونے کے تاجر بومن ہلی بابو کے ادارے کی جانب سے 25 لاکھ روپے کی مالیت کا آکسیجن کنسنٹریٹرز کرناٹک کانگریس کو عطیہ کیا ہے۔
اس موقع پر سابق وزیراعلیٰ سدارمیہ، سابق وزیر ضمیر احمد خان اور کرناٹک کانگریس کے صدر ڈی کے شو کمار نے بومن ہلی بابو کے اس کار خیر کی ستائش کی۔
اس عطیہ کے متعلق بومن ہلی بابو نے بتایا کہ کورونا وائرس سے انسانوں کو بچانے کے لیے آکسیجن کنسنٹریٹرز کی سخت ضرورت کو پر کرنے میں یہ ایک چھوٹی سی کوشش ہے۔
انھوں نے کہا کہ کورونا وائرس کی وبا کو کنٹرول کرنے میں بی جے پی حکومت مکمل طور پر ناکام ہوچکی ہے اس لیے اپوزیشن کانگریس کو آکسیجن کنسنٹریٹرز کا عطیہ کیا گیا ہے۔
بومانہ ہلی بابو کی جانب سے گزشتہ سال کووڈ کے چلتے تقریباً 4 کروڑ روپے کی مالیت کا راشن بھی ریاست کے مختلف علاقوں میں غریبوں کے لیے تقسیم کیا گیا تھا اور اس سال چونکہ آکسیجن کی قلت محسوس ہو رہی ہے تو بابو نے آکسیجن کنسنٹریٹرز کا عطیہ کیا ہے۔
