شب برات کے موقع پر کرناٹک کے یادگیر کے ضلع یادگیر میں علماء نے گھروں پر رہنے کی اپیل کی ہے۔ مولانا نظام الدین برکاتی نے اپنی اپیل میں کہا ہے کہ پورے ملک میں کورونا وائرس سے تحفظ کے لئے لاک ڈاؤن نافذ ہے۔ ایسے میں ہمیں اپنی ذمہ داری کو پورا کرتے ہوئے عبادات اپنے گھروں میں کرنا چاہئے۔
ای ٹی وی بھارت سے خاص بات چیت میں یادگیر کی مسجد صدر دروازہ کے امام و خطیب مولانا نظام الدین برکاتی نے کہا کہ کرونا وائرس کی وجہ سے اس وقت پورے ملک میں لاک ڈاؤن نافذ ہے۔ ایسے میں تمام مسلمانوں کو گھروں میں ہی عبادات کرنا چاہئے۔
انہوں نے کہا کہ یہ عبادت کی رات ہے۔ اس میں کثرت سے دعائیں قبول ہوتی ہیں، اللہ تعالیٰ تمام امت مسلمہ کی دعائیں قبول کرتا ہے۔ اس لئے آج کی رات کو مغفرت کی رات بھی کہا جاتا ہے۔
انہوں نے کہا کہ مسلمان توبہ و استغفار کریں اور اپنے مرحومین کے ایصال ثواب کے لئے قبرستان جانے کے بجائے گھروں میں رہ کر ہی ان کے لئے دعاؤں کا اہتمام کریں۔ اس کے علاوہ آج کی رات اس وبائی مرض کے خاتمے کے لئے بھی اللہ سے دعائیں کریں تاکہ رمضان کے قبل یہ وبائی مرض ختم ہو جائے۔