ریاست اترپردیش کے ضلع بریلی میں اعلیٰ حضرت امام احمد رضا خاں کا 101 واں عرسِ رضوی آئندہ 23، 24 اور 25 اکتوبر کو منعقد کیا جائےگا۔
شہر کے ایف آر اسلامیہ انٹر کالج کے میدان کے علاوہ متُھرا پور میں بھی اعلیٰ حضرت امام احمد رضا خاں فاضل، بریلوی کا عرس منایا جاتا ہے۔
عرس میں شرکت کرنے کے لئے ملک اور بیرونی ممالک سے لاکھوں زائرین بریلی آتے ہیں۔
مزید پڑھیں:ابھیجیت بنرجی سمیت تین کو اقتصادیات کانوبل انعام
عرس کے متعلق تمام تیاریاں شروع ہو چکی ہیں، یہاں منعقد ہونے والا عرس درگاہ تاج الشریعہ کے سجادہ نشین مفتی اسجد رضا خاں کی زیرِ سرپرستی میں مکمل ہوگا۔
اس سلسلہ میں جماعت رضائے مصطفےٰ کی جانب سے اعلان کیا گیا ہے کہ جلوس اور عرس میں شرکت کرنے والی تمام انجمن اس بات کا خیال رکھیں کہ اپنے ساتھ ڈی جے اور پالیتِھن ہرگز نہ لا ئیں۔
جماعت کے مطابق تیز آواز میں ڈی جے بجانے کی وجہ سے بزرگ اور بچے خوفزدہ ہو جاتے ہیں، جو تکلیف دہ بات ہے۔
اس کے ساتھ ہی تین روزہ عرس رضوی کے دوران پولیتِھن کا بھی استعمال نہ کرنے کی اپیل کی گئی ہے۔
عرس انچارج حضرت سلمان میاں کے مطابق عرس کے دوران زائرین سے اپیل کی گئ ہے کہ ایک مرتبہ استعمال ہونے والی پلاسٹک یا پالیتھِن کا استعمال نہ کریں۔
اس بابت لنگر کمیٹی اور دکانداروں کو بھی تاکید کی گئی ہے کہ وہ لنگر کا کھانا یہ دُکاندار کوئ سامان پالیتِھن میں رکھ کر تقسیم یا فروخت نہ کریں۔
عرس کی تمام تیاریوں کے متعلق متُھرا پور میں واقع مدرسہ جامِعۃ الرضا میں ایک میٹنگ کا انعقاد کیا گیا، جس میں جماعت کے رضاکار، عرس کور کمیٹی، لنگر کمیٹی اور دیگر مسائل پر بھی چرچہ کی گئ۔
سب سے اہم خلاصہ یہ ہے کہ میٹنگ میں پالیتِھن اور ڈی جے کو پابند کرنے کی خصوصی اپیل کی گئ ہے۔
