شمالی کشمیر کے ضلع بارہمولا کے پٹن علاقے میں پولیس کی جانب سے کی جارہی تفتیش کا ایک ویڈیو سوشل میڈیا پر وائرل ہو رہا ہے۔ ویڈیو میں پولیس کے کچھ عہدیداران ملزمان سے ایک قتل کے معاملے میں پوچھ گچھ کرتے ہوئے نظر آ رہے ہیں۔ تاہم سوشل میڈیا پر ویڈیو وائرل ہونے کے بعد پولیس نے فوراً دو پولیس اہلکاروں کو معطل کردیا ہے اور متعلقہ ایس ایچ او کے خلاف بھی انکوائری شروع کردی ہے۔
واضح رہے کہ پولیس نے رواں سال کے مارچ میں پٹن علاقے میں ہوئے ایک قتل کے معاملے میں مقتول کی بیوی اور اس کے ایک ساتھی کو گرفتار کیا تھا۔ ان ہی دونوں ملزمین سے پوچھ گچھ کی ویڈیو سوشل میڈیا پر اس وقت وائرل ہو رہی ہے۔
پولیس نے ایک بیان میں کہا کہ یہ ویڈیو پولیس تھانہ پٹن میں ایک قتل کیس سے متعلق تفتیش کے دوران کی ہے جو کیس گذشتہ ماہ حل ہوا تھا۔ ویڈیو میں دکھائے جانے والے دونوں ملزمین کو قتل کیس میں مبینہ طور پر ملوث پایا گیا تھا اور ان کو گرفتار کر لیا گیا ہے۔
پولیس نے مزید بتایا کہ ویڈیو وائرل ہونے کے معاملے میں دو پولیس اہلکاروں کو معطل کردیا گیا ہے اور متعلقہ ایس ایچ او کے خلاف انکوائری شروع کردی گئی ہے۔
پولیس نے یہ بھی کہا ہے کہ ویڈیو بنا کر سوشل میڈیا پر شیئر کرنا غیر ذمہ دارانہ حرکت ہے جس کے متعلق انکوائری شروع کی گئی ہے۔
