کشن گنگا میں تودہ گرنے کے بعد الرٹ جاری

دریائے کشن گنگا میں برفانی تودہ گرنے کی وجہ سے انتظامیہ نے گریز اور ملحقہ علاقوں میں الرٹ جاری کیا ہے۔

بدھ کو ضلع بانڈی پورہ کے گریز علاقے کے گجرن گاؤں میں دریائے کشن گنگا میں برفانی تودہ گرنے کے بعد انتظامیہ نے مقامی لوگوں کو اضافی احتیاط برتنے کی ہدایت دی ہے۔

بانڈی پورہ کے ڈی سی ڈاکٹر اویس احمد نے بتایا کہ ایس ڈی آر ایف، محکمہ روینیو، پولیس افسران اور ملازمین موقع پر پہنچ گئے ہیں، اور لوگوں کو دریا کے کنارے جانے سے پرہیز کرنے کے لیے کہا جارہا ہے۔

انہوں نے بتایا کہ معاملے کو سنجیدگی سے لیتے ہوئے ضلعی حکام نے الرٹ جاری کیا ہے۔ مقامی لوگوں سے کہا گیا ہے کہ وہ احتیاط برتیں اور دریا کے آس پاس نہ جائیں۔

انہوں نے عوام سے اپیل کی کہ وہ افواہوں پر دھیان نہ دیں، اور انتظامیہ کی جانب سے فراہم کردہ جانکاری پر توجہ دیں۔