قرآن کریم کی آیات کے حوالے سے سپریم کورٹ جانے والے وسیم رضوی کے تعلق سے مسلمانوں میں زبردست ناراضگی پائی جا رہی ہے۔ اشتعال انگیز بیانات اور انعامات کے اعلانات ہو رہے ہیں۔ وہیں، آل انڈیا مسلم پرسنل لابورڈ نے اس معاملے پر مسلمانوں سے صبر و تحمل کا مظاہرہ کرنے کی اپیل کی ہے۔ بورڈ کے ذمہ داران کا کہنا ہے کہ 'مناسب وقت پر قانونی چارہ جوئی کی جائے گی، اس کا فیصلہ بھی بورڈ کے اکابرین کریں گے۔'
اس تعلق سے مسلم پرسنل لا بورڈ کے رکن مولانا محفوظ الرحمن فاروقی نے کہا کہ 'قرآن مجید اللہ تعالیٰ کی جانب سے نازل کردہ کتاب ہے۔ اس میں کسی بھی قسم کی ترمیم و تبدیلی کی گنجائش نہیں ہے۔ وسیم رضوی نے اپنے آقاؤں کو خوش کرنے کے لئے ایک ناکام کوشش کی ہے۔ تمام اہل ایمان اس کی سخت مذمت کرتے ہیں اور متفقہ طور پر یہ بیان جاری کرتے ہیں کہ وسیم رضوی کا اسلام اور مسلمانوں سے کوئی تعلق نہیں ہے۔ شیعہ علماء نے بھی وسیم رضوی کو اسلام سے خارج قرار دیا ہے۔' اس پورے معاملے پر ای ٹی و ی بھارت کے نمائندہ نے بورڈ کے معزز رکن مولانا محفوظ الرحمن فاروقی سے بات چیت کی۔
