ترال: آتشزدگی واقعہ کے متاثرین کی سنی میموریل ٹرسٹ کی جانب سے مدد

بلال رضا ہمدانی نے اس موقع پر آتشزدگی واقعہ میں ہوئے نقصان پر صدمے کا اظہار کرتے ہوئے کہا کہ خوش قسمتی سے اس سانحہ میں کوئی جانی نقصان نہیں ہوا ہے۔

جموں وکشمیر سنی میموریل ٹرسٹ کے سربراہ مولانا بلال رضا ہمدانی نے نانر ترال کا دورہ کیا اور وہاں گذشتہ دنوں آتشزدگی کے واقعہ میں متاثر ہوئے افراد سے ملاقات کی۔

انہوں نے اپنے رفقاء کے ساتھ متاثرین کو ضروری غذائی اجناس اور گرم ملبوسات دیے، تاکہ ٹھٹرتی سردی کے ان ایام میں ان کو تھوڑا آرام مل سکے۔ بلال رضا ہمدانی نے اس موقع پر آگ کی واردات میں ہوئے نقصان پر صدمے کا اظہار کرتے ہوئے کہا کہ خوش قسمتی یہ رہی کہ اس سانحہ میں کوئی جانی نقصان نہیں ہوا ہے۔

انہوں نے متاثرین کو یقین دلایا کہ ٹرسٹ مارچ تک ان کے کھانے پینے کا انتظام کرے گا۔ ای ٹی وی بھارت سے مولانا بلال رضا ہمدانی نے کہا کہ صاحب ثروت افراد سے میری اپیل ہے کہ وہ اس دکھ کی گھڑی میں متاثرین کی معاونت کریں اور ان کی دلجوئی کریں تاکہ سرما سے قبل ان کے مکان کی چھت مکمل ہو سکے۔ انہوں نے انتظامیہ سے بھی بھر پور مالی معاونت کی اپیل کی۔