کورونا وائرس کے سبب کشمیر کے تمام ضلعوں میں محکمہ صحت نے حاملہ خواتین کا کورونا وائرس ٹیسٹ کرانے کا فیصلہ کیا ہے۔ کشمیر میں حمل کے 34 ویں اور 36ویں ہفتے کے دوران تمام حاملہ خواتین کا کورونا ٹیسٹ کیا جا ئے گا۔
وادی کے مختلف ا ضلاع میں یہ عمل تین ہفتے قبل شروع کیا گیا ہے اور صرف سرینگر شہر میں ابتک 700حاملہ خواتین کی اسکریننگ کی گئی ہے۔
محکمہ صحت کے مطابق خاتون ڈاکٹرز پر مشتمل خصوصی ٹیمیں ہر 15دنوں میں 34 ویں اور 36 ویں ہفتے کے حمل میں مبتلا خواتین کی اسکریننگ کریں گی اور زچگی سے قبل ان کے کورونا ٹیسٹ انجام دئے جائیں گے۔
چیف میڈیکل آفیسر سرینگر ڈاکٹر جہانگیر بخشی نے کشمیر عظمیٰ کو بتایا کہ' حاملہ خواتین کو زچگی سے قبل کسی بھی مشکل سے بچانے کیلئے یہ عمل شروع کیا گیا ہے '۔
انہوں نے کہا کہ'پہلے ریڈ زونوں میں حاملہ خواتین کی اسکریننگ ہوگی اور اس کے بعد دیگر علاقوں تک سکریننگ کا دائرہ بڑھایا جائے گا'۔
انہوں نے کہا کہ خصوصی ٹیموں میں شامل ڈاکٹرز کوتمام ضروری سامان فراہم کیے گئے ہیں ۔یہ بات قابل ذکر ہے کہ اننت ناگ ضلع میں محکمہ صحت کی اسکریننگ کے دوران 12 حاملہ خواتین کے ٹیسٹ مثبت آئے اور یہاں گھر گھر اسکریننگ کا عمل پچھلے 3ہفتوں سے شروع کیا گیا۔
