نیٹ 2021 کے امتحانات میں وادی کشمیر کے کئی طالب علموں نے بھی اچھی کارکردگی کا مظاہرہ کیا۔ آنچی ڈورہ اننت ناگ کے رہنے والے فاضل گلزار جنہوں نے کم وسائل کے باوجود بھی ملکی سطح پر منعقدہ اس امتحان میں نمایاں کامیابی حاصل کی۔
پیشے سے کنسٹرکشن مستری گلزار احمد ڈار کے بیٹے فاضل گلزار نے رواں برس نیٹ کے امتحانات میں 680 نمبرات حاصل کر کے اپنے والدین کے ساتھ علاقے کا نام روشن کیا ہے۔ فاضل گلزار کے مطابق انہوں نے ڈاکٹر بننے کے خواب کو پورا کرنے کے لیے کم وسائل کے باوجود کڑی محنت اور ٹائم منیجمنٹ سے کام لیا اور پہلی ہی کوشش میں انہوں نے کامیابی حاصل کی۔ ان کے والدیں کا کہنا ہے کہ فاضل کی قابلیت پر انہیں پورا بھروسا تھا اور اس نے اپنی محنت سے یہ بھروسہ قائم رکھا ہے۔
اتنے کم وسائل کے باوجود اپنے شوق اور لگن سے اس امتحان میں کامیابی حاصل کرنے والے فاضل گلزار دیگر نوجوانوں کے لیے مشعل راہ ثابت ہورہے ہیں۔ فاضل کا کہنا ہے کہ مسلسل جدو جہد ہی کامیابی کی کنجی ہے۔
- مزید پڑھیں: کشمیری طلبہ کی حمایت میں نیشنل کانفرنس کا احتجاج
واضح رہے کہ فاضل نے اپنی ابتدائی تعلیم نجی اسکولوں سے حاصل کی۔ دسویں جماعت کے بعد فاضل نے گورنمنٹ اسکول میں داخلہ لیا اور وہاں سے فارغ ہونے کے بعد انہوں نے سرینگر کے ایک نجی کوچنگ سینٹر سے ایم بی بی ایس کی کوچنگ لی۔ جبکہ اس سفر کے دوران انہیں کافی مشقت کا بھی سامنا رہا، لیکن جہد مسلسل اور پر عزم فاضل نے ہر چلینج کو قبول کیا جس کے بعداس کامیابی کا سہرا ان کے سر بندھا۔
