ضلع گاندربل کے ایک گاؤں ہائن پالپورا سے تعلق رکھنے والے 11 سالہ عبید جاوید نے ردی کو جمع کر کے کھلونا جے سی بی مشین، کرین وغیرہ بنائی ہے۔
عبید جاوید کی اس کوشش سے علاقے میں اُن کی کافی ستائش ہورہی ہے۔ ردی کو جمع کر کے مختلف اقسام کی چھوٹی چھوٹی کھلونا گاڑیاں بنانے والے اس کم عمر طالب علم نے ری سائیکلنگ کے فارمولے کو تقویت دی ہے۔
عبید کا تعلق ایک غریب گھرانہ سے ہے۔ وہ اس وقت چوتھی جماعت میں زیر تعلیم ہیں اور وہ یہ کام تیسری جماعت سے کررہے ہیں۔
عبید نے ای ٹی وی بھارت سے بتایا کہ وہ بہت کچھ کرنا چاہتے ہیں، لیکن ضروری چیزیں دستیاب نہ ہونے کی وجہ سے وہ اپنے خواب پورے نہیں کر پا رہے ہیں۔ ہونہار عبید نے انتظامیہ سے تعاون کی اپیل کی ہے، تاکہ وہ اس فن کو مزید آگے بڑھا سکیں۔
عبید کے والد جاوید احمد نے کہا کہ انہیں اپنے ہونہار بیتے پر فخر ہے، کیونکہ اتنی چھوٹی عمر میں بھی عبید کا کارنامہ بہت بڑا ہے۔ اُنہوں نے کہا کہ عبید بہت کچھ کرنا چاہتا ہے اور اُن میں وہ صلاحیت بھی ہے تاہم اسے انتظامیہ کے تعاون کی ضرورت ہے۔
