کوکرناگ میں گرام سبھا کا انعقاد

اس موقع پر بی ڈی سی چیئرپرسنز اور مقامی لوگوں نے پینے کے پانی، بجلی کی فراہمی، پی ایم جی ایس وائی سڑک منصوبوں کے معاوضے کی فراہمی، سڑکوں کی مرمت و دیگر مسائل و مطالبات کو اجاگر کیا۔

جنوبی کشمیر کے ضلع اننت ناگ میں انتظامیہ کی جانب سے گڈیل، بدہاڈ اور کھریتی دیہات کے لئے ٹربل سب پلان کے تحت اقبال پورہ کھریتی کوکرناگ میں گرام سبھا کا اہتمام کیا گیا۔ جس میں بی ڈی سی چیئرپرسن، پنچ، مذکورہ دیہات کے سرپنچوں کے علاوہ اوقاف کمیٹی ممبران، سول سوسائٹی کے ممبران اور ممتاز شہری شریک ہوئے۔

یہ اپنی نوعیت کی پہلی گرام سبھا تھی جس میں ضلع ترقیاتی کمشنر اننت ناگ کے کے سدھا، ایس ڈی ایم کوکرنگ اور محکمہ دیہی ترقی، اینمل ہسبنڈری، پی ایچ ای، پی ڈی ڈی، آر اینڈ بی، آئی اینڈ ایف سی، سماجی بہبود، تعلیم، صحت، زراعت کے افسران شریک ہوئے۔ اس موقع پر بی ڈی سی چیئرپرسنز اور مقامی لوگوں نے پینے کے پانی، بجلی کی فراہمی، پی ایم جی ایس وائی سڑک منصوبوں کے معاوضے کی فراہمی، سڑکوں کی مرمت و دیگر مسائل و مطالبات کو اجاگر کیا۔ ضلع ترقیاتی کمشنر نے بی ڈی سی ممبران کو ہدایت کی کہ مذکورہ علاقوں کی بنیادی ضروریات کے بارے میں ایک تفصیلی رپورٹ انہیں پیش کی جائے تاکہ لوگوں کے مسائل و مطالبات کو حل کیا جا سکے۔