اننت ناگ کے ڈپٹی کمشنر ڈاکٹر پیوش سنگلا نے کہا کہ دیہی علاقوں میں مہلک وبا کورونا وائرس کو پھیلنے سے روکنے کے لئے پنچایتی سطح پر کووڈ آئسولیشن یا نگہداشت مراکز کو قائم کرنا وقت کی اہم ضرورت ہے۔
انہوں نے ان باتوں کا اظہار اننت ناگ کے ڈاک بنگلو میں دیہی ترقی، صحت اور دیگر متعلقہ محکموں کے افسران کے اجلاس کی صدارت کرتے ہوئے کیا۔
ڈی سی نے افسران پر زور دیا کہ کووڈ مثبت مریضوں کے لئے ضلع کے ہر پنچایت میں 5 بستروں والا کووڈ کیئر سینٹر بنایا جائے۔ جس میں کم سے کم ایک بیڈ میں آکسیجن کی سہولت دستیاب ہو ۔
انہوں نے افسران کو ہدایت دی کہ وہ پنچایت میں ڈسٹرکٹ کیپکس بجٹ کے تحت دستیاب فنڈ میں سے ایک لاکھ کی رقم کا استعمال کر کے یہ مراکز سرکاری عمارتوں اسکولوں میں قائم کریں اور اس سلسلہ میں نزدیکی ہیلتھ سینٹر اور پنچایت کے ذمہ داران سے پہلے مشاورت کی جائے۔
ڈاکٹر سنگلا نے مزید کہا کہ آئسولیشن مراکز کا نزدیکی طبی مراکز کے ساتھ معقول تال میل اور رابطہ ہونا چاہئے اور تمام ضروری سہولیات کی دستیابی کو یقینی بنایا جائے تاکہ کووڈ مریضوں کے علاج و معالجہ اور ضرورت کے اوقات میں مریضوں کو دوسرے ہسپتال منتقل کرنے میں پریشانی نہ ہو۔
ڈی سی نے کہا کہ مذکورہ آئسولیشن مراکز قائم کرنے سے دیہی علاقوں میں طبی ڈھانچہ مستحکم ہوگا اور اسے ٹیلی میڈیسن سہولت کے ساتھ بھی جوڑنا چاہیےْ
انہوں نے متعلقہ افسران کو ہدایت دی کہ وہ دیہی علاقوں میں کووڈ19 جانچ میں سرعت لائیں اور ٹیسٹنگ میں تیزی لانے کے لئے موبائل ٹیسٹنگ وین کا بھی استعمال کریں ۔
