آندھرا پردیش کے ضلع چتور میں پولیس نے تلگودیشم کے بیشتر رہنماؤں کو گھروں پر نظربندکردیا ہے تاکہ چلو تھمبلاپلی پروگرام کو ناکام بنایاجا سکے۔
جمعہ کو اس علاقہ میں اپوزیشن تلگودیشم اور حکمران جماعت وائی ایس آرکانگریس کے کارکنوں میں ہوئے تصادم کے نتیجہ میں تلگودیشم کا ایک کارکن زخمی ہوگیا تھا اور بعض گاڑیوں کو بھی نقصان پہنچا تھا۔
اس کے بعد تلگودیشم پارٹی نے ہفتہ کو احتجاج کی اپیل کی تھی۔ اس معاملے میں کسی بھی قسم کے ناگہانی واقعات کو روکنے کے لئے پولیس نے اپوزیشن کے رہنماؤں بشمول سابق وزیر امرناتھ ریڈی، این کشور کمار ریڈی، جی شنکر یادو، پی نانی، بی این راج نرسمہلو، جی نرسمہا یادو اور دیگر کو ان کے مکانات پر نظربند کردیا ہے۔
پولیس نے واضح کیا کہ کوویڈ کے اصولوں کے پیش نظر کسی بھی قسم کی ریلی، جلسے یا جلوس کی کوئی اجازت نہیں ہوگی۔
(یو این آئی)
