اترپردیش شہر علی گڑھ میں واقع معروف علی گڑھ مسلم یونیورسٹی (اے ایم یو) میں بین الاقوامی یوم خواتین کے موقع پر ایڈوانسڈ سینٹر فار ویمنس سٹڈیز میں منعقدہ پروگرام میں سینٹر کی ڈائریکٹر پروفیسر عزرا موسوی نے کہا کہ 'یوم خواتین ہمیں خواتین کی جدوجہد کو اور ان کی حصولیابیوں کو سراہنے کا موقع فراہم کرتا ہے'۔
پروفیسر عزرا موسوی نے مزید کہا یہ دن شہری اور دیہی علاقوں میں خواتین کی تفویض اختیارات کا عزم کرنے اور صنفی مساوات کے لیے بیداری پیدا کرنے کا دن ہے۔
ایڈوانس سینٹر فار ویمنس سٹڈیز نے سنہ 2021 کے عالمی یوم خواتین انتہائی جوش و خروش اور علامت کے ساتھ منایا۔
واضح رہے آٹھ مارچ کو عالمی سطح پر یوم خواتین کے طور پر منایا جاتا ہے تاکہ صنفی مساوات کے لیے جدوجہد، کامیابیوں اور وعدوں کو نشان زد کیا جاسکے۔
صنفی مساوات کے حصول میں بین الاقوامی یکجہتی کی نمائش کے لیے ہر برس مختلف موضوعات کا انتخاب کیا جاتا ہے تاہم رواں برس کا مرکزی خیال 'صنفی تعصب اور عدم مساوات کو چیلنج کرنے اور پکارنے کے لیے ایک بین الاقوامی کال ہے'۔
اس موقع پر طلبہ، اساتذہ اور ملازمین نے خواتین کے تفویض اختیارات پر زور دیتے ہوئے پلے کارڈ بلند کیے۔
دوسری طرف اے ایم یو ویمنس کالج کے ہندی سیکشن نے 'کووڈ وبا کے دوران خواتین کے لیے مساوی مواقع' موضوع پر نظم نویسی مقابلے کا اہتمام کیا۔
پروفیسر ریشما بیگم نے بتایا یوم خواتین پر فی البدیہہ تقریری مقابلے کا بھی اہتمام کیا گیا وہیں دوسری جانب ڈاکٹر اسماء نے یوم خواتین کی اہمیت پر خطاب کیا۔
نیشنل سروس سکیم (این ایس ایس) کے عملے اور رضاکار طلبہ نے بھی یوم خواتین منایا اور آن لائن پروگرام کا انعقاد کیا۔
ڈاکٹر ارشد حسین (پروگرام کوآرڈینیٹر، این ایس ایس)، ڈاکٹر جوہی گپتا، ڈاکٹر مجاہد علی خان اور اجمل کفیل نے خواتین کی حصولیابیوں پر تقریریں کی۔
