مرکز کے زیر انتظام لداخ کے گلوان خطے میں چین اور بھارتی افوج کے مابین پر تشدد جھڑپ میں متعدد بھارتی فوجیوں کی ہلاکت پر عالمی شہرت یافتہ علی گڑھ مسلم یونیورسٹی (اے ایم یو) کے وائس چانسلر پروفیسر طارق منصور نے افسوس کا اظہار کرتے ہوئے چین کی اشتعال انگیز کارروائی کی مذمت کی۔
پروفیسر طارق منصور نے کہا ’’ہم اپنے جوانوں کی شہادت پر انہیں سلام پیش کرتے ہیں اور ہندوستانی فوج کے افسروں اور بہادر جوانوں کے رنجیدہ کنبوں کو اپنی تعزیت پیش کرتے ہیں۔ یہ افسوس کی بات ہے کہ ہمارے جوانوں کو وطن کی حفاظت پر مامور رہتے ہوئے جانوں کی قربانی پیش کرنی پڑی۔ یہ بہت تکلیف دہ ہے۔‘‘
وائس چانسلر نے دعا کرتے ہوئے کہا کہ ’’شہیدوں کی قربانی رائیگاں نہیں جائے گی، اور اس مشکل گھڑی میں ان کے اہل خانہ اور متعلقین کو حوصلہ عطا کرے۔‘‘
بتا دیں کہ پیر اور منگل کی شب لداخ کے گلوان خطے میں بھارت اور چینی افوج کے مابین جھڑپ کے دوران بیس فوجی اہلکار ہلاک ہوئے۔ چین کی اس جارحانہ کارروائی کی مذمت کی جا رہی ہے وہیں اقوام متحدہ کے جنرل سیکریٹری نے تشویش کا اظہار کرتے ہوئے بھارت اور چین کو تحمل کا مظاہرہ کرنے کی اپیل کی ہے۔
