علی گڑھ مسلم یونیورسٹی کے جواہر لعل نہرو میڈیکل کالج کے انیستھیسیالوجی شعبہ کی ڈاکٹر شہانہ علی اور میکانیکل انجینیئرنگ شعبہ کے ڈاکٹر یاسر رفعت کی باہمی کوشش سے کووڈ-19 کے انفیکشن سے ڈاکٹروں اور نرسیز کے تحفظ کے لیے نہایت کم خرچ میں انفیکشن پروٹیکشن باکس تیار کیا گیا ہے۔
ڈاکٹر شہانہ نے بتایا کہ یہ باکس ڈاکٹر اور نرسوں کے تحفظ کے لیے ایک اہم گھیرا فراہم کرے گا اور وہ لوگ جو کووڈ-19 کے مریضوں کے علاج سے براہ راست جڑے ہوئے ہیں ، وہ اس کے انفکیشن سے محفوظ رہ سکیں گے۔
انہوں نے کہا کہ کورونا وائرس سے متأثر مریض کو وینٹیلیٹر پر رکھنے سے قبل اس کی سانس کی نلی میں ایک نلکی ڈالی جاتی ہے اور اس وقت ڈاکٹر اور دیگر عملہ کو اس مرض کی تعدی کا شدید خطرہ رہتا ہے۔
انہوں نے بتایا کہ اس پروٹیکشن باکس میں کافی جگہ ہے اور ڈاکٹر اس کے باوجود آسانی سے کام کر سکتے ہیں۔
انہوں نے کہا کہ اس باکس کی صفائی کے بعد اسے دوبارہ استعمال کیا جاسکتا ہے
ڈاکٹر شہانہ نے بتایا کہ صحت خدمات سے منسلک عملہ پرسنل پروٹیکشن اکوپمینٹ کا استعمال کرتے ہیں لیکن مریضوں کی سانس کی نلی میں نلکی ڈالتے وقت مریض کو کھانسی آجانے سے ہونے والی تعدی کے خطرات سے بچانے میں اس باکس کی بڑی اہمیت ہوگی۔
